ANG taga-Davao City nga sila Andre Kenny Sing ug Dana Mariella Abad milabni og duha ka titulo sa paghuman sa 9th Elias Dacudao Cup Junior Tennis Tournament, Dominggo, Disyembre 15, sa Las Terrazas Subdivision indoor tennis courts sa Maa, Davao City.
Ang duwa gihimo sa Ecoland 1 Tennis Center, Ecoland Phase 2 ug Ecoland Phase 4 Tennis Club courts apan ang finals matches gisibog sa Las Terrazas tungod sa kusog nga ulan.
Si Holy Child College of Davao netter Sing, milingkawas gikan ni Yassan Al Anazi, 7-5, 6-2, sa boys 14 and under championship match.
Nauna niyang gipildi si Rey Anthony Byrd, 7-5, 2-6, 6-3 sa semifinals.
Ang tandem ni Sing uban si Jude Miguel Hidalgo mipildi nila Jude Machael Andrei Padao ug John Roddick Litang via walkover aron makuha ang boys 16-under win.
Si kanhi Palarong Pambansa medalist Abad, nga kasamtangang nagduwa sa National University (NU), mipildi ni Jufe-An Cocoy, 6-3, 6-3, sa girls 18 and under titular showdown.
Si Abad miangkon sab sa girls 18-under doubles title tali partner Nina Angeline Alcala.
Sila Abad-Alcala, midemolis sa pares nila Pauline Palac ug Theresa Claire Nacito, 6-2, 6-2.
Sa laing duwa, si Rhea Jean Palac mipupo sa eight and under unisex title. Jose Kael Palo sa Kidapawan City mipildi ni Shaun Globasa, 4-0,4-0 sa 10-under unisex finals. Si Palo ug Inigo Nathaniel Barrios mipildi ni Globasa ug Krelz Jan Gecosala, 4-2, 4-0, sa 10-under unisex doubles. Si Palo usab mipildi ni Rafael Duay, 6-3, 6-2, sa boys 12-under finals. Samtang si Hannah Divinagracia mibalik gikan sa first set loss pinaagi sa pagpildi kang Stefi Marithe Abudo, 3-6, 6-1, 6-3 sa girls 12-under finals. Si Divinagracia nanguna ni Nina Angelina Alcala, 6-4, 4-6, 10-8 sa girls 14-under finals.
Si Joewyn Pascua gikan sa Manila, mipildi ni Ruper Ohrelle Tortal, 7-6 (5), 7-5 sa boys 16-under championship. Cocoy mipahagba ni Nacito, 6-0, 6-4, sa girls 16-under finals ug Joaquin Karl Palo sa Kidapawan City mihari sa 7-6 (3), 6-1 nga kadaugan kontra Angil Balaoing sa boys 18-under finals.
Ang Philippine Tennis Association nagpaluyo sa duwa nga gihimo katambayayong ang Philippine Tennis Academy.