DIHANG nasayran nako nga nahugno ang duha ka dagko nga tindahan sa Padada, Davao del Sur tungod sa kusog nga linog, gibati nako ang tumang kaguol.
Misamot ang akong kaguol dihang nabalitaan nga dunay nangamatay ug naangol sa hitabo.
Sa lungsod sa Padada man gud, ako nagbaligya sa among mga produkto sa una ug kuha nga isda sa panagat niadtong nagtungha pa ako sa high school.
Naa sab sa maong lungsod nagpuyo ang akong mga paryente, higala ug klasmeyt mao nga naguol kaayo ako.
Niadtong Lunes sa buntag, Disyembre 16, pipila sa akong mga paryente ang nagpahibalo nga naguba ang ilang panimalay sa magnitude 6.9 nga linog niadtong Dominggo, Disyembre 15. Ug tungod sa sunod-sunod nga pagtay-og sa yuta, kasamtangan sila nga nagpuyo sa evacuation center.
Sanglit di nila mahimong biyaan ang pamilya, di sila makapangita og pagkaon matag adlaw, mao nga kinahanglan nila karon ang tabang sa gobyerno.
Hinuon, naghatag na ang Department of Social Welfare and Development Field Office (DSWD)-Davao Region og P1.1 million nga kantidad sa hinabang sa mga apektadong pamilya sa Davao del Sur.
Sa gipagawas nga suwat pahayag sa ahensiya, ilang gitunol ang 1,145 family food packs, 1,200 laminated sacks, ug walo ka family tents, nga direktang gitunol sa mga biktima sa Matanao, Padada, ug Digos City.
Alang sa atong mga igsuon nga biktima sa linog, ang DSWD dunay gimuntar nga satellite operation center sa provincial capitol compound sa Davao del Sur aron maniid sa kahimtang sa mga internally displaced persons (IDPs) ug nagpadala og miyembro sa ilang quick response team aron maglusad og relief operations sa grabeng naapektuhan nga lugar.
“The Disaster Response and Management Division is also expecting the opening of additional evacuation centers in the already hard-hit areas of the previous series of earthquakes and the deployment of additional camp managers from the field staff during the holidays,” suma sa pa suwat pamahayag sa DSWD.
Nasayud ako nga ang gitunol sa DSWD sa mga biktima, di paigo sa pipila ka adlaw nila nga pagpuyo sa evacuation center.
Busa, miduyog ako sa panawagan nga motabang kita sa mga biktima bisan sa ginagmay lamang nga hinabang.
Kay sa paghimo niini, atong mapakita ang tinuod nga diwa sa Pasko nga mao ang paghinatagay ilabina ngadto sa mga biktima sa linog karong kapaskuhan.