KIDAPAWAN CITY -- Nadakpan ang giingong platoon leader sa New People’s Army (NPA) alas kuwatro sa hapon niadtong Lunes sa probinsiya sa North Cotabato.
Giila ang suspek nga si Dante Idao, 41, minyo, molupyo sa Sitio Caligawan, Barangay Noah, Magpet.
Sa taho gikan sa 901st Brigade, Philippine Army, nasayran nga nasiplatan si Idao sa iyang mga silingan nga miuli sa ilang balay hinungdan nga dali nila kining gitaho ngadto sa mga awtoridad.
Abtik nga nagresponde ang militar ug kapulisan diin ilang gidakop ang suspek, ilawom sa Guerilla Front Committee 53.
Nakuha gikan sa posisyon ni Idao, alyas Kumander Roman, ang usa ka kalibre .45 nga pistola, tulo ka magazine ug mga buhing bala.
Gitumbok sa 901st Brigade nga si Idao maoy nanguna sa pagpamanhig sa mga sundalo ug pulis sa Magpet niadtong 2017.
Nangulo sab siya sa pagpanulong sa mga Army ug Cafgu detachments sa Magpet, Antipas, Arakan ug President Roxas sa probinsiya.
Mag-atubang ang suspek og mga kasong multiple murder, multiple frustrated murder, extortion ug daghan pang uban, kinsa giingong dugay nang gipangita sa mga awtoridad.
Si Idao, anaa sa poder sa 901st Brigade ug gipailawom sa tactical interrogation. (Edgar E. Fuerzas)