STO. TOMAS, Davao del Norte -- Duha ang angol kinsa anaa sa ospital, human gidunggab sa ilang katagay sa inom gumikan gibugal-bugalan nga pisot.
Ang insidente natigayon alas 7:15 sa gabii niadtong Dominggo, Disyembre 15, didto sa usa ka purok sa Marson, Barangay Tibal-og.
Gipangtambalan sa Davao Regional Hospital sa Tagum City ang duha ka biktima nga sila alyas Ruben, 36-anyos, ug Randy, 50-anyos (mga bansagon gitago), pulos nagpuyo sa Purok 20 samtang ang suspek mao si Premo, 59-anyos.
Subay sa taho sa Police Regional Office (PRO-Davao Region), ang mga nahisgutan nagtagay og ilimnong makahubog sa usa ka purok, diin sa dihang nangahubog na, giingong gibugal-bugalan si Premo sa duha ka biktima ug giingnan og pisot.
Sa kalagot sa suspek, mikuha kini og kutsilyo dayon gipangdunggab ang duha dayon misibat ang suspek.
Gipangdala dayon sa ospital ang duha ka biktima samtang ang kapulisan naghimo og manhunt operation sa pagsikop sa suspetsado.