DALAYGONG lakang ang pagpahigayon og surprise drug tests labi na sa mga kawani sa kagamhanan aron pagseguro nga luwas kini sa gidiling drugas ug pagsuporta sa kampanya batok sa gidiling drugas, mangtas nga dangan sa sosyodad.
Bisan tuod himuong kinalit aron way makaipsot o makapangdam, apan kinahanglan usab sa pilion ang himuong rason sa pagtakoban sa drug test sama sa pagrespito sa tradisyon labi na sa simbahan o relihiyuso aspeto.
Niadtong Biyernes, Disyembre 13, si Capitol Site Barangay Councilor Kelly Quijada, pangulo sa fire volunteers sa dakbayan sa Sugbo, nipahibalo sa iyang mga miyembro sa naasoy nga adlaw, Disyembre 13, maoy ilang Christmas party.
Ibutang nato ang atong kugalingon nga sakop sa maong grupo, unsay imong bation sa pagkahibalo sa Christmas party? Siyempre malipay. Naghunahuna nga makadawat og regalo. Makalingaw nga duwa. Daghang makabuhong nga pagkaon ug mainom.
Apan unsay imong bation kon pag-abot sa dapit nga ang gipaabot nga party usa diay ka drug test. Seguro daghang nagbagulbol sa hilom. Nasanta ang gipaabot nga pinoble nga ginagmay nga kalipay sa mga boluntarya. Paeta, boluntaryo pa ug buhatan sa ingon labi na sa mga buotang sakop sa grupo.
Ang Cebu Office for Substance Abuse Prevention (Cosap) maoy mipahigayon sa maong drug test.
Dili ba salikwaut nga rason? Dili ba pagbugalbugal sa tradisyon sa Chistmas party? Ang Christmas party dili lang kini yano nga panagtapok, ang lawom nga kahulugan niini mao ang pag-ambahan sa pagka tawo sa Manunubos? Gigamit nga taluban sa drug test? Pagkahiktin sa hunahuna.
Hinaut dili kini buhaton sa ubang grupo, ahensiya o lokal nga kagamhanan. Ipadayon ang kampanya batok sa gidiling drugas apan tradisyon tahura, sama sa Pasko ujg uban pa.