GIPAKGANG sa Dallas Mavericks ang kainit sa hosts Milwaukee Bucks pinaagi sa 120-116 nga kadaugan kagahapon sa National Basketball Association (NBA).
Ang Mavericks mao ang nakaputol sa 18 ka sunodsunod nga kadaugan sa Bucks unya ang mas nakapangangha pa, ilaha kining nahimo bisan wala ang ilang batan-ong sinaligan nga si Luka Doncic.
Mao kini ang labing unang pilde sa Bucks gikan niadtong Nobiyembre 8 diin napukan sila sa Utah Jazz, 103-100.
Ang Bucks natagak sa 24-4 nga rekord samtang ang Mavericks mingsaka sa 18-8 nga rekord.
Gusto unta sa Bucks nga masumpayan ang ilang sunodsunod nga kadaugan aron taas ang ilang moral alang sa gikaintapan nilang pagpakigsangka sa league-leader Los Angeles Lakers nga maoy sunod nilang kontra apan motugot ang Mavericks niini.
“It’s going to be a test for us,” matod sa labing sinaligan sa Bucks nga si Giannis Antetokounmpo. “The Lakers are one of the best teams in the league. We’ve got to play good basketball. We’ve got to move the ball. Obviously as a team, we don’t want to lose two in a row.”
Si Antetokounmpo nagpakatap og 48 puntos ug 14 rebounds aron pangulohan ang dismiyadong Bucks.
Komportableng naglabaw ang Mavericks sa 4th quarter apan nausab ang dagan sa estorya dihang nakapanghudlat ang Bucks sa himatyong segundos.
“I’m proud of the way the guys fought to the very last second tonight,” asoy ni Bucks coach Mike Budenholzer.
“To find a way to be close in the fourth quarter and have an offensive rebound and give ourselves a chance, I think it’s just a sign of the competitive nature of this group.”
Sa pagpadaplin ni Doncic, kinsa adunay naangol (sprained right ankle), sila si Seth Curry ug Kristaps Porzingis ang ming-agak sa Mavericks.
Ningpupo og 26 puntos matag usa sila si Curry ug Porzingis aron pangulohan ang kadaugan.
“I’ve been in this league a long time and an 18-game winning streak is a spectacular demonstration of how good a team is,” matod ni Mavericks coach Rick Carlisle.
Sa laing mga duwa, ningdaog ang Houston Rockets batok San Antonio Spurs, 109=107, Oklahoma City Thunder batok Chicago Bulls, 109-106, Memphis Grizzlies batok Miami Heat, 118-111, Toronto Raptors batok Cleveland Cavaliers, 133-113, Washington Wizards batok Detriot Pistons, 133-119, ug Portland TrailBlazers batok Phoenix Suns, 111=110. (AP, ESL)