BORONGAN City, Eastern Samar -Tulo ang patay ug 15 ang samdan sa pag ambush sa kapulisan sa Eastern Samar sa Barangay Libuton ning lungsod alas 3 sa hapon, Biyernes, Disyembre 13, 2019.
Base sa report sa kapulisan, sa tulo nga nakalas, usa niini ang pulis nga si Patrolman Mark Jerome Rama ug laing duha ka sibilyan nga sila si Agripena Traboco,69, taga San Julian, Eastern Samar; ug Anthony Balayanto, 50, taga Taft, Eastern Samar.
Ang mga pulis nga samdan giilang mao sila si Patrolman (Pat) Angelito Loterte, naigo sa paa; Pat. Rick Capoquian, naigo sa tuo nga mata; Pat. Rey Sobrepenia, naigo sa may ulo; Pvt. Kevin Operario, kritikal.
Wa maunsa si Pat. Christian Godino ug Pat. Michael Frank Pajanustan.
Niabot usab sa 11 ka mga sibilyan ang samdan nga sila si Jacon Chicano, 35; Marian Esposa, 20; Carlito Esposa, 65; Mark Balayanto, 18; Florence Traboco, 39; Mary Grace Rapada, 44; Ma. Lilisania Obina, 34; Hector Lemer, 35 ug dunay tulo ka mga bata nga nag edad og 1,6 ug 13.
Ang mga samdan nga pulis ug sibilyan dali nga gidala sa duol nga tambalanan.
Base sa imbestigasyon, ang mga pulis nga sakay sa ilang patrol car padung unta sa ilang provincial headquarters.
Pag-abot nila sa lugar diin didto sab ang mga sibilyan nga ilang kadungan, kalit nga usa ka Improvised Explosive Device (IED) ang mibuto ug nisunod ang pagpamusil.
Gibana bana sa kapulisan nga naa sa kapin kun kulang 50 ka New Peoples Army (NPA) ang mi-ambush.
Natagak sa usa ka lawom nga bahin sa daplin sa karsada ang patrol car.
“I am encouraging the public to be more vigilant and to continue in helping the authorities in condemning such treacherous attack to wreak havoc in the region and to stop unlawful killings of the civilians,” matod ni PRO8 Director Ferdinand Divina.
Gikondena sa Police Regional Office (PRO) 8 ug Philippine Army ang pagpamanhig nga midamay pa og mga sibilyan.
Nakaalerto karon ang mga awtoridad lukop Eastern Visayas.