LINAIN nga pamaagi sa pamasko ang gihimo sa kapulisan sa dakbayan sa Talisay, diin 16 ka police retirees nga taga Siyudad sa Talisay ilang gipasidunggan ug gihatagan og regalo, alas 3 Lunes sa hapon, Disyembre 16, 2019.
Gihimo kini sa Children’s Park sa Barangay Poblacion, Siyudad sa Talisay. Mismo si Police Brigadier General Ildebrandi Usana, deputy regional director for administration sa Police Regional Office-7 ug retired Police Brigadier General Cecil Sandalo, pinasidunggang mga dinapit.
Matod ni Police Major Gerald Ace Pelare, hepe sa TCPS, nga gihimo kini paghatag og bili, pagpasidungog, ug pagpasalamat sa gihatag nga serbisyo sa 16 ka retiradong mga pulis nga taga Talisay.
“The activity is conducted to honor our retired police personnel who really worked hard for the PNP by delivering a dedicated police service which every citizen in Talisay City rightly deserves,” pasabot ni Pelare
Si Sandalo, sa iyang mensahe, niawhag sa kaubanang retired police nga pabilin gihapon nga moserbisyo ug motabang sa TCPS sa pagpatunhay sa kahapsay ug kalinaw sa ilang simple nga paagi.
Nihagit siya sa mga anaa pa sa serbisyo nga mahimong panig-ingnan ang retirado nga mga pulis nga tinuoray sa pagpanerbisyo.
Sa iyang bahin, gipasalamatan ni Usana ang 16 ka Talisaynon nga mga retired police isip sila ang hinungdan sa mga benipisyo nga gi-enjoy karon sa mga anaa pa sa PNP.
Iyang giila nga unsung heroes ang maong mga retired police. Gawas sa pagpasidungog kanila gihimo usab ang mga padula, ug gamay nga salu-salo. (FMD)