“MERRY” gyud ang Christmas sa mga senior citizen sa Dakbayan sa Lapu-Lapu karong tuiga.
Di lang kay ang senior citizens lang, apil na usab niini ang mga person with disability sa siyudad nga nagdawat og cash aid sa Siyudad.
Kini gumikan kay nakadawat na usab sila og laing P3,500 nga cash aid gikan sa Kagamhanan sa Dakbayan.
Gipang apod-apod kini ni Lapu-Lapu City Mayor Junard “Ahong” Chan niadtong milabayng weekend sa nagkadaiyang barangay sa dakbayan.
Ang uban nga wa makakuha sa ilang cash aid mahimo gihapong makabisita sa city hall aron pagkuha sa ilang bahin.
Nasayran nga gidugangan ni Chan og P3,000 ang cash aid sa mga senior citizen karong Pasko.
Kini gumikan kay P500 na lang unta ang dawatonong cash aid sa mga senior citizens gumikan kay ang P3,500 ila namang nakuha niadtong Hunyo.
Sa naaandan, ang usa ka senior citizen magdawatan og P4,000 matag tuig gikan sa kagamhanan.
Moabot sa 26,528 ka mga senior citizen ang anaa sa dakbayan nga gigahinan og P92.8 milyones nga pundo sa kagamhanan.
Gawas sa mga cash gift, gitagaan usab sa kagamhanan ang mga senior citizens nga nag-birthday sa Nobiyembre ug Disyembre og P1,000 aron ilang ipamalit og unsa ilang gusto.
Sukwahi kini sa naandan nga cake maoy ipanghatag sa kagamhanan.
Alangkang Chan nga mas maayo nga kwarta ang ihatag aron ang senior citizen nga nag-birthday ang magbuot kon unsaon niya paggasto ang kwarta.
Mokabat og P2.917 milyones ang gigahin sa kagamhanan sa mga nag-birthday nga senior citizens.
Malipayon usab ang Pasko sa persons with disabilities (PWD) sa dakbayan sanglit gipadak-an usab ang ilang nadawat nga cash aid gikan sa P3,000 ngadto na sa P5,000.
Sa kinatibuka-an, ang Siyudad nigahin og P106.47 milyones alang sa pahalipay sa mga senior citizen ug PWD.