ANG Land Transportation Office (LTO) 7 moabli og dugang upat ka mga buhatan sa mosunod nga 30 ka adlaw.
Si LTO 7 Regional Director Victor Caindec nagkanayon nga sunod semana makahimo sa pag-operate ug makadawat na og transaksyon ang district office (DO) sa La Libertad sa Negros Oriental alang sa ilang driver’s license ug vehicle registrations.
“Ang La Libertad District Office nato technically online na siya , connected na siya sa main server. Naa na siyay server code ug imo nang ablihon sa LTO nga opisina, makita na siya sa among computer. Ang kuwang didto ang dry run kon dili ba magka problema ang system,” padayag ni Caindec.
Human sa Negros, ang LTO 7 mosunod og abli sa district office sa lungsod sa Tubigon sa lalawigan sa Bohol aron di na sila mobiyahe paingon sa Tagbilaran City para sa pagkuha sa ilang driver’s license ug pagprehistro sa ilang sakyanan.
Ang pangulo sa LTO 7 niingon nga aprobado na usab sa Department Transportation (DOTR) ug napirmahan na usab ni Assistant Secretary Edgar Galvante ang Driver’s License Renewal Office (DLRO) nga mahimutang sa Grand Mall (kanhi Jai Alai) sa Barangay Mambaling ug laing DLRO nga mahimutang sa Gaisano Country Mall sa Barangay Banilad.
Ang pag-abli sa dugang upat ka mga opisina sa LTO gibanabana nga mahimo sa Enero 2020. Gihulagway kini ni Caindec nga makapakatag sa mga tawo aron dili sila magpundok sa usa ka opisina nga moresulta sa paspas nga transaksyon. (PAC)