MAGTAGBO ang appraisal committee sa Cebu City Government ug Provincial Capitol para sa pagbanabana sa presyo sa 32 ektaryas nga luna ilawom sa 93-1 nga gipuy-an sa dul-an 5,000 ka mga pamilya sa Dakbayan sa Sugbo.
Kini human gipakawaybili ni Gobernador Gwendolyn Garcia ang memorandum of agreement nga gipirmahan kaniadto nila ni kanhi gobernador Hilario Davide III nga maoy bise gobernador ug kanhi mayor Tomas Osmeña niadtong Disyembre 2016.
Ang land swap deal gipirmahan sa duha ka mga opisyal atubangan sa mga beneficiary.
Si Konsehal Raymond Garcia, majority floor leader sa City Council ug pag-umangkon sa gobernador, nagkanayon nga nakadawat og suwat ang iyang iyaan gikan sa Commission on Audit (COA) nga nagpahibawo nga ang landswap niadtong 2016 wa niagi ug way pagtugot sa ilang buhatan.
Ang duha ka appraisal committees gikan sa duha ka local government unit magtagbo sa labing dali nga panahon para ila nang masugdan ang pagsulbad sa problema.
Ang batan-ong Garcia, kinsa kaalyado ni Mayor Edgardo Labella ,nagkanayon nga human unya sa pagkuha sa presyo sa yuta sa 93-1, mangayo sila og approval gikan sa COA.
Didto na sila subli nga magsabot unsay paagi sa pagbayad para mahatagan og security of tenure ang libuan ka mga pamilya nga nagpuyo sa maong mga luna.
Dugang ni Garcia nga mohimo sila og lakang sa konseho ug posibleng mao say buhaton sa Provincial Board para ma-rescind ang memorandum of agreement ug mohimo og bag-ong MOA uban sa terms of reference nga pinasubay sa balaod.
Sa MOA nga gipirmahan nila ni Davide ug Osmeña, ang 32 ektaryas nga luna sa Kapitolyo nga gipuy-an sagad sa mga aspiring sector gihulipan og prime lots.
Base sa record niadtong 2016, sa 4,364 ka home lots ilawom sa 93-1, 1,445 ang fully paid; 1,188 ang wa pa katiwas og bayad samtang 1,731 ang wa pa gyud nakabayad
Kini naglangkob sa 2.5 ektarya sa South Road Properties, 3.3 ektarya sa block 27 sa North Reclamation Area, siyam ka ektarya sa Pulpogan sa Consolacion, 1.37 ektarya ug 2,746 square meters nga pulos nahimutang sa NRA ug ang pito ka ektarya nga kanhi Cebu Zoo. (PAC)