KAPULISAN sa Siyudad sa Sugbo alerto sa posibling pagpangabot sa notadong mga mangunguot ug mga kawatan gikan sa mga silingang rehiyon sa Central Visayas ning nagkaduol na ang Pasko.
Publiko giawhag nga di magdalag daghang kwarta ug mahalong butang sa ilang paglakaw.
Matag tuig,adunay mga reklamo nga madawat ang kapulisan nga nabiktima sila sa mga mangunguot sa mga dapit nga daghang tawo.
Di na kini bag-o sa habig sa Cebu City Police Office (CCPO) tungod kay ang Dakbayan sa Sugbo maoy dayuhonon gikan sa Disyembre hangtod sa Enero tungod sa Sinulog.
Tungod niini, ang City Intelligence Branch (CIB) hugot nga nag monitor sa posibling pag abot sa mga kawatan gikan sa mga silingang rehiyon ug didto Mindanao.
Apan sa pagkakaron, wa pa silay nadawat nga kasayuran nga aduna nay dayo nga mangunguot sa Dakbayan sa Sugbo.
Niadtong nanglabay nga mga semana adunay mga post sa social media nga nabiktima sila sa pagpanguot sulod sa pampublikong sakyanan sa dakbayan diin nakuha sa kawatan ang mahalon nila nga cellular phone.
Apan matod ni Police Lieutenant Colonel Clark Arriola nga kon aduna may nabiktima nga midangop sa mga police station, aduna usay nagpakahilom lang ug wa na moreklamo.
Awhag lang niya sa katawhan nga di mag post sa social media sa mga di tinuod nga insidente tungod kay makahatag lang og kahadlok sa publiko.
Labing maayo mo report sa labing duol nga police station.
“Gani, manghangyo mi sa mga netizen nato nga dili mag magpakalat og fake news. Pwede siya nga it could create caution sa mga tawo pero pwede pud maka create siyag panic,” matod ni Arriola.
Lakip sa pahimangno sa kapulisan sa Dakbayan sa Sugbo ngadto sa publiko nga di mag post sa Facebook kon asa sila namakasyon, diin tanang mga miyembro sa pamilya niuban tungod kay mahimong kini maoy maghatag og idiya sa mga kawatan.
Labing maayo nga magbutang og mga gadget nga ilang ma monitor ang ilang balay sama sa CCTV camera o kaha ipahibawo sa silingan nga mo bakasyon sila aron moabag sa pagbantay. (AYB)