Pork, pork products sa Samar-Leyte gi-ban

TUNGOD sa paglibkas na sa mga rehiyon nga nagpalibot sa Central Visayas sa ban order sa pagpasulod og mga produktong baboy gikan sa Luzon, ginadili na ang pagsulod sa mga produkto sa baboy, isda, ug lain pang pork-related products nga nasagol sa mga produktong baboy nga gikan sa Eastern Visayas o sa mga probinsiya sa Leyte ug Samar.

Kini maoy bag-ong kamandoan ni Gobernador Gwendolyn Garcia ubos sa gipagawas nga Executive Order No. 27, lakang aron malikay sa pagkatap sa African Swine Fever (ASF) virus ang Central Visayas.

Lakip na sa kamandoan ang pagpakita sa airlines ug shipping lines nga gikan sa Rehiyon 8, sa kompleto nga mga dokumento sa karga ug certificate of no commingling tali sa veterinary quarantine officer.

Samtang sa padayon nga monitoring sa ASF task force sa Probinsya sa Sugbo nagtinguha karon ang grupo nga masakmit na usab ang mga produktong baboy sa habgatang bahin sa Sugbo nga posibleng nasagol sa mga produkto nga gikan sa Luzon.

Ang tanan nga mga produkto nga nasakmit sunugon sa usa ka pugon.

Sulod lang sa tulo ka buwan gikan sa Septiyembre, hangtod na sa Nobiyembre 30 ning tuiga, miabot na sa P78,000 ang nagasto sa Kapitolyo sa pagsunog sa produkto o thermal destruction niini.

Matag kilo sa mga produkto nagkantidad og P15.

Gikan sa pagsugod sa pagsunog sa mga produkto, gibutyag ni Dr. Mary Rose Vincoy nga ubos sa opisina sa gobernador ang gasto sa proseso.

“...Charged to the governor’s office for the time being kay ang pag-execute ni Governor sa first nga EO, tanan nga expenses in relation to the expenses sa task force charged to the office of the Governor but for next year we have set aside disposal incineration expenses under the funds nga na allocate sa provincial veterinary office”, matod ni Vincoy.

Apan matod ni Vincoy nga gipahibawo siya sa gobernador nga giaprubahan na sa kompaniya sa Taiheiyo Cement ang pagpagamit sa ilang pugon aron masunog ang mga produkto.

Sa naandan, matag Lunes sa usa ka semana usahon ang mga produkto nga nasakmit gikan sa Pier 1 ngadto sa 6 aron dunganon pagsunog sa usa ka pasilidad nga nahimutang sa dakbayan sa Mandaue.

Susihon pa hinuon niya kon unsa ang pamaagi sa kompanya ug kon susama ba gihapon ang schedule sa pagsunog sa mga produkto. (ANV)