GI-DENY sa Cebu City Legal Office ang gipangayong occupancy permit (OP) sa management sa usa ka property developer para sa ilang tower 2 nga nahimutang sa General Maxilom Avenue.
Sa legal opinion sa buhatan ni City Attorney Rey Gealon, iyang gihulagway nga way legal nga basehan pag-isyu og full OP ang Taft Property sa 46-storey building sanglit daghan sila og kakuwangan subay sa National Building Code of the Philippines.
Niadtong Nobiyembre 11, 2019, si Myra Lynn Gilig, VP and deputy chief operating officer sa Taft Property, nipadala og suwat ngadto kang Mayor Edgardo Labella aron aprobahan ang ilang gipangayo nga OP para sa ilang Tower 2 sa Horizons 101 aron magamit na ang ilang ika-36 hangtod 46 nga andana.
Didto gipahibawo ni Gilig nga nakigtambayayong na siya sa Department of Public Works and Highways (DPWH) ug Department of Engineering and Public Works (DEPW) para sa joint construction sa drainage gikan sa ilang building nga maoy kuwang.
Sa wa pa nipakanaog og desisyon si Gealon, nakig-alayon una sila sa buhatan ni architect Florante Catalan, officer in-charge sa Office of the Building Official (OBO), nga maoy adunay lawom nga kahibawo labot sa construction sa maong edipisyo.
Niadtong Nobiyembre 27, si Catalan nitubag kang Gealon ug nisaysay nga samang affidavit of undertaking nga giduso didto sa OBO.
Ilang gihangyo si Gilig niadtong Nobiyembre 25 sa pag-submit sa mga dokumento nga ilang nasabutan tali sa DPWH, DEPW ug Taft Property uban sa application para sa OP uban sa pagkumpleto sa ilang mga kakuwangan para sa umaabot nga evaluation ug pagproseso.
“It appears that as of date, Myra Lynn R. Gilig did not comply with the directive of OBO and instead opted to directly request the City Mayor for the issuance of OP sans further compliance to OBO requirements,” tipik sa legal opinion ni Gealon.
“It must be emphasized that laws apply to all. There can be no exception when there is none allowed by law.There is neither legal nor factual basis for their request,” dugang ni Gealon.
Si Kenneth Enriquez sa DEPW niingon ang kuwang sa developer mao ang tapping permit, apan dili sila mahatagan dayon kay walay andam nga public drainage.
“Ni-propose ang Taft nga through tax credit, sila mo-construct sa drainage system up to Lahug river. Karon naa sa OBO ang ball if mo-okay sila to issue og OP while on-going pa ang drainage design nga for implementation sa Taft,” padayag ni Enriquez.
Apan nasuta ning mantalaan nga dili lang ang drainage construction ang problema sa developer sanglit base sa inspeksyon sa OBO niadtong Agusto 5, 2019, aduna pay 12 ka kakuwangan ang developer gikan sa architectural section, electrical section, sanitary/plumbing section ug CTO clearance.
Ang OBO nihatag og temporary OP ngadto sa Taft Property gikan sa basement sa edipisyo hangtod sa ika-35 nga andana.