MGA illegal nga nagpasugal sa swertres nangabulabog human gipangronda ang ilang mga outlet sa tibuok dakbayan sa Sugbo, Lunes sa gabii, Disyembre 16, 2019.
Moabot na sa kapin 50 ka mga tawo ang nangadakpan sukad mimando ang hepe sa Police Regional Office 7 pagsikop sa mga nagpadagan sa illegal nga sugal.
Miabot na sa 54 ang nangadakpan sa kapulisan sa siyudad, wa pay labot ang mga nadakpan sa PRO 7 atol sa ilang sunod-sunod nga mga operasyon batok sa illegal numbers game.
Labing minos, 37 ka mga outlet ang na-raid sa CCPO, way labot ang sa PRO 7.
Matod ni Police Lieutenant Colonel Clark Arriola, information officer sa Cebu City Police Office, nga sukad niadtong Sabado, Disyembre 14, miabot na sa 30 ka operations ang ilang nahimo.
Kasagaran mao kadtong nagpadagan sa illegal small town lottery nga way pagtugot gikan sa Philippine Charity Sweepstakes Office (PCSO).
Nag-una nga police station nga adunay daghang operations ug nadakpan mao ang Labangon Police Station ug Talamban police. Sila nakasikop og 24 ka mga tawo nga nagpataya sa illegal swertres.
Sa dakbayan sa Sugbo, aduna lamay usa ka operator ang gihatagan sa PCSO og permiso nga makapadayon sa legal nga sugal nga mao ang Globaltech Peryahan ng Bayan.
Apan giingong adunay nagpasugal usab nga daw sama sa dagway sa Globaltech, apan way tarpaulin nga adunay marka sa PCSO.
“Kining mga parokyano nato nga didto lang sila sa legal kay gani man dili sila hatagan sa ilang daog, wala man silay mahimo kay dili man nila magukod. Kay in the first place, illegal man. Pero adto sila sa legal makatabang na sila sa atong national government at the same time naa gyud silay hold nga kon maka daog sila, mahatagan gyud sila,” matod ni Arriola.
Tungod niini, magpadayon ang kapulisan sa pag gukod sa illegal nga nag operate sa STL tungod kay wa mapunta sa gobyerno ang kita, didto ra sa bulsa sa mga operator.
Sa bahad ni Police Brigadier General Valeriano de Leon nga hulipan niini ang mga chief of police nga wa mohimo sa ilang trabaho pagpuhag sa illegal nga sugal, matod ni Arriola nga dili kini mahitabo sa siyudad sa Sugbo.
Kay alang niya nga bisan sa wa pa ang mando sa PRO-7 director, nagsugod na sila sa ilang kampanya batok illegal swertres. Matag semana, adunay assessment nga himuon ang CCPO.
Hugot nga gi monitor sa kanhi CCPO director nga karon General Manager na sa PCSO, Royina Garma, ang sitwasyon sa illegal nga sugal sa dakbayan sa Sugbo. Duna siyay gipadala nga suwat nga dakpon ang nalambigit sa ilegal nga sugal sa tibuok siyudad.