Motosiklo nadumbol, 2 angol

NANGAANGOL ang duha ka mga lalaki human natumba ang gisakyang motorsiklo ug nadumbol pa sa dyip niadtong Domingo, mga alas 11:30 sa gabii sa Barangay Tambaling, siyudad sa El Salvador, Misamis, Oriental.

Pulos nabali ang tiil nila ni Melvin Bacalares, 22, ulitawo, driver sa motorsiklo ug sa backrider niining si Rey Obsioma, 40, mga mulopyo sa Barangay Poblacion, susamang siyudad.

Nasayran nga nakainom ang mga biktima dihang nagmaneho sa motorsiklo, paingon na sila nga manguli gikan naglingaw-lingaw sa usa ka balay sa higala.

Apan nawad-an og balanse si Bacalares hinungdan sa pagkaligid ug pagkaiipit sa ilang mga tiil sa motorsiklo.

Nabanggaan pa ang duha dihang wala sab maka brake ang usa ka dyip. Niini nadumbol ang motorsiklo apil ang mga biktima ug nakahig sa kalsada.

Nabali ang tiil ni Bacalares ug Obsioma samtang ubay-ubay nga bun-og sa lawas ang naangkon sa mga biktima.

Mismong driver sa dyip ang dali nga midala sa mga biktima sa Northern Mindanao Medical Center (NMMC) ning siyudad sa Cagayan de Oro.

Nasayran nga kini ang ang ika 30 nga kaso sa aksidente sa dalan nga natala sa NMMC diin mga biktima gituohang nakainom ug ilimnong makahubog.

Sa pagsulat ning balita, nagpabilin pa sa balay tambalanan ang mga biktima apan daw luwas na sa makuyawng kahimtang.