Nalzaro: Passion o suweldo?

GIKATAHO nga adunay shortage sa mga nurses sa mga pribado ug pampublikong ospital dinhi sa Sugbo. Matod pa adunay mga ospital nga nanira na sa ilang ubang floors kay dili na maatiman ang mga pasyente gumikan sa kakulangon sa nurses. Ang ideal ratio unta matag nurse adunay 15-17 ka mga pasyente. Pero karon wala na matuman.

Mismo si Department of Health (DOH) 7 Regional Director Jaime Bernadas ug Joseph Descallar, presidente sa Philippine Nurses Association (PNA) Cebu chapter, maoy mikompirmar niini. Unsay rason? Gumikan kay bisan unsa ka daghan ang mikuha sa maong propisyon ug nakapasar sa board examination, pila ra ka buok nga mga lisensiyadong nurses ang mipraktis sa propisyon.

Kay ngano man? Gumikan sa kagamay sa suweldo, sobra nga trabaho, ka delikado sa environment ug dili kaayo makabakasyon. Ang uban, inig graduate ug pasar sa board exam igo lang manarbaho dinhi og pipila ka buwan o tuig, unya mo-abroad dayon. Way makaambas nga mga hospital dinhi sa ato sa suweldo kon itandi sa abroad. Labi pa sa Amerika, Canada, United Kingdom ug Middle East countries.

Ang suweldo sa nurses dinhi sa ato labi pa sa mga private hospitals tag-P10,000 matag buwan. Sus, wa gani sa daily minimum wage. Mas dako-dako gamay sa mga public hospitals labi pa sa mga nationally funded hospital sama sa Vicente Sotto Memorial Medical Center. Mas modako pa ni kon mapasar kanang balaod nga mag-increase sa ilang suweldo ngadto sa P30 mil kapin matag buwan. Unya mahal kaayo magpatungha sa maong kurso.

Pero unsa may palabihon sa uban? Kanang imong passion o gugma o sinseridad sa imong propisyon kay mao gyuy gusto nimo o ang ekonomikanhong panginahanglan? Mikuha ka anang maong kurso gumikan kay mao ang imong gusto. Mao nay passion. O mikuha ka anang maong kurso gumikan lang sa imong maayong kaugmaon gumikan kay dako ang suweldo. Para sa uban, mag-unsa man nang passion o gusto kon magkutoy ang imong tiyan. Pero para pod sa uban, bisan gamay og suweldo, basta malipayon ka sa imong propisyon.(bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph