KAHIBUDNGAN nga lantaran ang pagpamaligya og swertres sa giingong ilegal nga mga outlet sa small town lottery (STL) nga way permiso sa gikan sa Philippine Charity Sweepstakes Office (PCSO).
Nag-operate ang mao nga mga outlet nga wa mahibaw-i nga ilegal diay kini hangtod nga nipahibawo si PCSO general manager Royina Garma nga dunay mga outlet nga ilegal nga nag-operate. Giubanan usab kini sa mando ni Police Regional Office (PRO) 7 Director Valeriano de Leon nga puhagon ang tanang matang sa ilegal nga sugal.
Kon wa pay gisaligan nga tawo nga hayan naa sud sa kagamhanan, di tingali ingon niana kaisog ang tag-iya ning mga outlet sa pagpamaligya og ticket sa swertres. Sa ato pa, dunay bendisyon kining mao nga buhat.
Niini, di lang kay pangrondahon ang mga outlet ug panakpon ang inosenteng mga trabahante nga wa masayod nga ilegal ang ilang gibuhat. Gikinahanglan nga dunay ipahigayon nga imbestigasyon kinsa ang mga tawo nga nagpaluyo niini.
Ang operasyon sa mga STL sa tibuok Pilipinas gipangsuspenso ni Presidente Rodrigo Duterte human niya madiskobrehe ang grabeng kurapsyon. Napagan gud ang regular nga mga bola sa PSCO lotto. Maayo gani gipabalik ra dayon sa Presidente ang lotto kay naangin ra diay.
Duna pay mga utangan sa mga STL operator og minilyon ka pesos nga wa pa mabayri sa kagamhanan hinungdan nga duna pay mga dapit nga way operation. Anha ra sila makabalik kon mahuman na sila og bayad.
Ning pag-operate sa mga illegal STL outlet sa Dakbayan sa Sugbo ug ubang dapit sa lalawigan, gikinahanglan nga susihon o imbestigahon sa kagamhanan. Ilhon sila kon kinsa ang mga nagpaluyo. Kay kon way opisyal nga naghatag og bendisyon sa ilang operasyon, di tingali ingon niana ka isog ang operator o mga operator sa STL nga ilegal nga nag-operate.