MOABOT sa 25 ka mga drug surrenderer ang nigradwar sa community based rehabilitation program sa kagamhanan sa lungsod sa Consolacion sa milabayng Lunes, Disyembre 17.
Ang naasoyng mga “surrenderer” nga karon gitawag na og “reformist” sa kagamhanan mao ang nakalampos sa nagkadaiyang session sa programa sa Local Government Unit LGU sukad pa niadtong buwan sa Hunyo kun sulod sa 6 ka buwan.
Sagad niini mga drug “surrenderer” sa kabarangayan ug mga kanhi binilanggo nga nipaubos sa plea bargain agreement.
Matod ni Abelardo Banuag ang consultant sa Municipal Anti Drug Abused Council MADAC nga 45 gayud unta ka mga surrenderer ang unang nipaubos sa ilang community based rehabilitation program apan 25 lang gayud ang nakalampos sanglit mao ra usab ang ilang nakita nga hingpit nga nakabiya sa ilang bisyo sa ginadiling drugas.
Ang uban giingong niundang usab sa pagtambong sa ilang mga session nga gibahin ngadto sa upat ka phase.
Ang phase one mao ang admission kun pag-angkon sa mga surrenderer sa ilang paggamit ug ginadiling drugas.
Ang phase two mao ang gitawag ug capability building samtang ang phase 3 mao ang gitawag og skills training diin nakigtambayayong ang local government units ug Technical Education and Skills Development Authority (Tesda).
Kada adlaw ang session sa phase 3 ug 8 ka oras matag adlaw, sumala pa ni Banuag.
Usa sa nakitang rason ni Banuag sa pag-undang sa pipila ka mga surrenderer sa ilang mga session mao gayud ang kakuwang ug suporta sa pamilya sanglit kasagaran sa mga nigradwar permi gayud ubanan sa ilang pamilya matag session.
“With the help of Tesda para makakuha ka ug national certificate you need to render 12 hours so that is why everday gyud ta pag-abot sa phase 3,” matod ni Banuag.
Samtang gibutyag ni Consolacion Mayor Johannes “Joyjoy” Alegado nga ang mga nigradwar sa ilang community based rehabilitation program ilang himuong resource person sa padayong pag implementar sa naasoyng programa sa nagkadaiyang barangay.
Aron usab masigurong kanunay gayud nga ma-monitor ang mga “reformist” sa ilang naandang bisyo usa ka session ang gitagana alang kanila sa kagamhanan matag Huwebes kada semana diin ipaubos sila kanunay sa drug test.
Awhag ni Alegado sa ubang nagumon sa ginadiling drugas sa pagduol sa kagamhanan sanglit libre man ang naasoyng programa alang sa tanan ug mabalik sa komunidad nga luwas sa druga.
Ang pag-gradwar usab sa 25 ka mga “reformist” nagpakita lang nga aduna pa gayud diay kahigayonan ang si bisan kinsa nga nagumon sa ginadiling drugas nga matul-id ug matarong pagbalik ang iyang kinabuhi.
“Akong giawhag ang atong mga kaigusonan nga nagduha-duha, nahadlok, nalibog or unsa ba nga magpaubos ani kay kini alang kaninyo kay kami sa kagamahanan naghuna-huna usab kaninyo, ayaw mo kawad-i uo paglaom kay gitagaan gayud ang tanan ug kahigayonan nga magbag-o ug mag-usab aron kitang tanan maluwas ug walay mabiktima sa tokhang ug uban pang sama niana,” matod ni Alegado sa pakihinabi sa Superbalita Cebu. (GCM)