SELOS ang motibo sa lalake nga nipatay sa iyang kapuyo niadtong Sabado sa kaadlawon, Disyembre 14, sa Sitio Sambag, Barangay San Vicente, lungsod sa Liloan.
Ang pamilya ni Bianca Paige Bayong pursigidong mopasaka og kaso batok kang Eldie Orquiza, 27.
Si Liloan Police Station Chief Investigator nga si Arnie Goc-ong nga base sa ilang imbestigasyon, nagkalalis ang duha tungod nasakpan ni Orquiza nga anaay lain uyab si Bayong ug kini usab giangkon sa nauwahi.
“Nag-away man daw ni silang duha gikan sa trabaho. Natog na ang mga ginikanan sa lalaki maong didto to sila sa gawas nagka-istorya. Niangkon ang babaye mao to napikal sad ang lalaki mao tong iyang gibuhat,” saysay ni Goc-ng.
Usa ka buto sa armas ang nadungan sa mga silingan ni Bayong ug kini naigo sa luyong bahin sa ulo sa biktima ng hinungdan sa iyang kamatayon.
Dungag Goc-ong nga dali-dali nga miikyas ang suspek human sa insidente ug kini nipadulong sa lungsod Santander aron unta motago apan nitahan dayon kini sa Santander Police Station pagkagabie sa maong adlaw sa insidente.
Wala na nila ma rekober ang armas nga gigamit ni Orquiza saysay ni Goc-ong ug wala usab niini gilimod ang iyang gibuhat.
Saysay ni Liloan Police Station Senior Master Sergeant Jonas Patubig nga nadawat nila ang alarma alas 7:45 na sa buntag diin usa sa mga silingan sa biktima ang nitawag kanila.
Amdam mopasaka og kaso ang kabanay sa biktima ug anaa na usab sa kustodiaya sa polisya ang suspek. (JCT)