HUMAN nimando si Police Brigadier General Valeriano de Leon, direktor sa Police Regional Office 7 nga panakpon na ang nagpadayon sa pag operate sa illegal numbers game, gihingusgan na usab kini sa kapulisan sa Probinsya sa Sugbo.
Apan matod ni Police Colonel Roderick Mariano nga lahi ang sitwasyon sa Lalawigan sa Sugbo tungod kay aduna nay gihatagan og permiso sa Philippine Charity Sweepstakes Office (PCSO) nga maka operate sa Small Town Lottery.
Ang operator na ang mopahibawo sa kapulisan labot sa presensya sa mga illegal nga nagpadagan sa swertres sa kalungsuran nga dali usab nga madakpan.
Sukwahi kini sa Siyudad sa Sugbo nga way gitugotan nga maka operate sa STL diin adunay mga iligalista ang nagpadagan usab sa swertres.
Matod ni Mariano nga ang ilang gihimo sa Probinsya sa Sugbo sa dihang mi balik na ang operation sa STL, nakig-alayon dayon sila sa operator ug sa PCSO aron sila na mismo ang moila kinsa ang legal ug kinsa usab ang angay nga gukdon.
“Dito sa Cebu province na meron tayong mga authorized STL operators. At tayoy nakiki pag collaborate sa kanila together with the PCSO na lahat ng mga illegal sa respective cities and municipalities na ituturo nila at itoy makikita natin sa mga conducted na operation ng ating mga kapulisan at ating mga naaresto sa illegal gambling,” matod ni Mariano.
Usa sa mga timailhan niini ang pamahayag sa awtorisado nga STL operator nga misaka ang ilang halin sukad gihingusgan nila ang kampanya batok sa illegal numbers game.
Giangkon hinuon niya nga aduna pay ginagmay nga nagpasugal sa illegal swertres apan nagtago-tago kini sa kabarangayan.
Iyang gimandoan ang mga chief of police nga monitoron kini aron di na maka-operate.
Niadtong miaging adlaw, ang kapulisan sa Siyudad sa Sugbo nakasikop og 55 ka mga tawo nga naaktohan nga nag operate sa illegal nga sugal sa pipila ka mga barangay sa dakbayan. (AYB)