PAHIMANGNO alang sa mga driver sa Transport Network Vehicle Service (TNVS) sa Sugbo nga nagmonitor ang Land Transportation Franchising and Regulatory Board (LTFRB) 7 sa overcharging ug sa mga kanselasyon niini hilabi na karon nga holiday season.
Kini human gipahamtangan na usab sa Philippine Competition Commission (PCC) ang Grab Philippines og P16.15 milyones nga multa tungod sa overcharging ug kanselasyon sa mga riders niini.
Apan si LTFRB 7 Regional Director Eduardo Montealto Jr., nagkanayon nga kining overcharging ug cancellation sa mga TNVS wa mahitabo sa Sugbo.
Dugang niya nga aduna silay team nga nag-monitor niini ingon man mga force multiplier nga nitabang pag-monitor.
Giklaro usab niya nga kining gipahamtang karon sa PCC sa Grab Philippines, alang lang sa mga sumasakay sa Metro Manila.
Si Montealto nagkanayon nga nakigtagbo usab sila sa Grab Cebu aron masiguro nga di mahitabo kining nahitabo karon sa Manila.
Gipasabot usab sa director ang publiko nga kining pag-surge sa pletehan sa TNVS sa Sugbo mapa-Angkas man o Grab, nahasubay sa guidelines sa pletehan nila nga gi-set usab sa ilang ahensiya.
Hinuon di makahatag ang LTFRB 7 sa fare range ug fare surge range alang sa mga TNVS.
Gani, naka-database ang pag-price surge sa mga TNVS nga lakip sa gi-monitor sa LTFRB 7.
Matod ni Montealto nga tungod kay daghang players ang gusto mosulod sa Manila hinungdan nga aduna’y problema nga daling mabantayan tungod kay lupigon sa dagko nga players kining gagmay nga players o kining Transportation Network Companies (TNCs).
Mao kini ang nahitabo karon nga daghang reklamo ang madawat sa PCC diin nakapamulta na usab diay ni sa Grab PH og P23 million niadtong nakalabay nga buwan.
Tuod man, gipahibawo sa LTFRB 7 nga kon makasinati og overcharging o kaha kanselasyon ang pasahero, mamahimo nga moreklamo kini sa ilang buhatan.
Dugang ni Montealto nga mas maayo nga mahimong pormal ang reklamo tungod kay aduna’y due process sila nga gisunod.
Usa sa himuon nila kon makadawat og reklamo mao ang pagkuha og habig sa driver, TNC, ug reklamante.
Kinahanglan lang nga makuha ang igong mga detalye sa reklamo susama sa plate number, detalye sa sakyanan, driver, ug uban pa.
Gipahibawo ni Montealto nga magkadako ang multa niini tungod kay anaa kini lahi nga kwentada sa multa sa TNVS.
Hinuon, kon di mogamit ang usa ka driver sa application niini, anaa kini multa nga P5,000 alang sa sa first offense kon mapamatud-an nga guilty.
Ug P10,000 alang sa second offense ug P15,000 alang sa third offense ug 30 ka adlaw nga impound sa unit ingon man posible nga matangtangan kini og prangkisa.
Giawhag nila ang sumasakay nga di mahadlok ug mosumiter og pormal nga reklamo kon makasinati sa maong mga dili makiangayon nga insidente.