GIPAUBOS sa duha ka mga buwan nga preventive suspension sa Cebu City Council ang barangay kapitan sa Zapatera gumikan sa nagpatongpatong nga mga sumbong batok kaniya.
Ang Committee of Three sa Konseho nga gilangkuban nila ni Konsehal Phillip Zafra, Dondon Hontiveros ug Antonio Cuenco nga pulos sakop sa south district, nirekomendar sa suspension samtang magpadayon ang pag-resolbar sa kaso para di siya makaimpluwensiya sa desisyon. Gitataw sa tulo nga ilang nakaplagan nga lig-on ang mga ebidensya batok kang Franklin Benedicto.
“After careful perusal of the records, this Committee finds the imposition of preventive suspension proper. From the numerous and overwhelming evidence presented, it is patiently clear that the requirement under the Local Government Code are met and that preventive suspension is necessary to ensure that the evidence will not be tampered with testimonies remain uncorrupted and a thorough and proper investigation can be conducted,” matod sa rekomendasyon sa committee of three.
Gibabagan
Apan di sayon ang giagian sa pag-aprobar sa pag-suspenso kang Benedicto sanglit gibabagan sa opposition.
Nahitabo nga nagtabla ang botasyon kay pito ang pabor samtang pito ang supak.
Si Bise Mayor Michael Rama na ang nibuak sa panagtabla sanglit si Konsehal Jerry Guardo ni-abstain. Ang CoT maoy nidawat sa nagpatongpatong nga mga reklamo batok kang Benedicto.
Una, mao ang gross misconduct and dereliction of duty nga gisang-at ni Atty. Jigo Dacua, pangulo sa City Environment and Natural Resources Office gumikan sa kalapasan sa RA 9003 kun Ecological Solid Waste Management Act of 2000 ug City Ordinance 1361 nga may kalabutan sa garbage disposal, City Ordinance 2031 nga may labot sa waste segregation.
Mga reklamo
Laing reklamo nga nadawat sa CoT mao ang giduso sa mga konsehal sa Zapatera batok kang Benedicto niadtong June 24, 2019.
Kini gihulagway nga prejudicial to the interest of public service.May labot kini sa graft and corruption.
Si Benedicto gipasannginlan nga iyang gimanduan si Jackylou Quijano, barangay treasurer, sa pag-release sa honoraria sa barangay tanod nga wala ni-report sa trabaho.
Giingong iya usab nga gimandoan si Charlenn Aristine Bersales , liaison officer, sa di pag-isyu og resibo sa rental sa bus ug gym. Nag-atubang usab siya og kasong sexual harrassment nga gisang-at ni Bersales.
Gireklamo usab siya og illegal termination nila ni Quijano ug Bersales human sila ni-file og kaso sa Ombudsman.
Iya usab nga gitangtang sila si Calixto Carin Jr., ug William Ugang Jr. Nitudlo siya og bag-ong barangay personnel nga way pagtugot sa barangay council ug ang pagtangtang sa wiring ug cable para sa biometrics para di maka-log-in ang mga trabahante sa barangay.
Ang pag-padlock sa barangay hall ug ang iyang pagdumili pagpirma sa tseke alang sa honorarium sa kawani sa barangay.
Ang letter complaint nga giduso sa mga konsehal sa Zapatera giubanan og affidavit nilang Quijano, Bersales, lakip na ang pictures ug ubang mga dokumento.
Si Benedicto gisuwayan og tawag sa Superbalita Cebu sa iyang buhatan sa barangay hall apan di sab makontak ang ilang telephone number.
Gisuwayan og private message ang iyang social media account, apan hangtod niining pagsuwat, wa pa siya nitubag aron unta makuhaan siya og pamahayag. Ang pangulo sa CoT nga si Zafra niingon nga ang buhatan ni Labella maoy mo-serve sa suspension uban sa tabang sa Sangguniang Panlungsod Secretariat sa mosunod nga mga adlaw.