NAHIDANGAT sa dakbayan sa Davao ang pwersa sa Task Force Oro Rescue mga alas 5:10 sa hapon niadtong Biyernes, Disyembre 15, sa Padada, Davao del Sur.
Ang lokal nga kagamhanan sa siyudad sa Cagayan de Oro pinaagi sa City Disaster Risk Reduction and Management Department (CDRRMD), Oro Rescue 911 Urban Search and Rescue (USAR), ug Emergency Medical Services (EMS) Task Force Oro Rescue sa pagpangulo ni Nick Jabagat ang mismong nitunol og tabang sa mga nabiktima sa pagtay-og sa maong dapit nga nakasinati og magnitude 6.9 nga linog.
Nagdala ang task force og mga bottled drinking water ug mga trapal alang sa mga biktima nga nagkinahanglan kaayo niini, samtang dala usab nila ang water tanker sa dakbayan nga maoy magamit sa pagsuplay og tubig ngadto sa mga nagkinahanglan.
Tumong usab niini nga makatabang diha sa search and rescue operation sa nahagba nga istraktura, samtang ang EMS maghatag og medical assistance sa mga biktima.
Gibutyag ni Nick Jabagat, tsirman sa CDRRMD, nga anaa sa kapig 30 ka mga personahe ang mga andam alang sa mga susama sa nahitabo sa Davao gumikan kay niagi kini og mga pagbansay.
Una na nga nibutyag si Mayor Oscar Moreno nga andam nga magpadala og personahe sa CDRMMD aron makatabang ilabi na nga well-trained sa search and rescue operations ang mga personahe dinhi sa dakbayan.
“Gi-train kana sila diha sa mga linog nga nag-collapse nga building. Niagi na na sila og training diha. Naa say mga ekipo nga magamit para sa pag-retrieve simbako,” matud ni Moreno.
“I already talked to Colonel Monsanto and I gave him green light if he wants to send a rescue team in the earthquake-hit areas,” matud ni Moreno.
Gidugang pa niini nga magbilin lang usab og mga personahe alang dinhi sa dakbayan.