PUNO sa kalipay ug lingaw ang mga hulagway sa piniriso sa kasaulogan sa Pasko sa Binilanggo nga ang programa gipahigayon adlaw’ng Lunes, Disyembre 16, sulod sa Misamis Oriental Provincial Jail (MOPJ).
Kini gipangunahan nila ni MOPJ Jail Warden Dominador Tagarda ug Assistant Jail Warden Maricris Mulat.
Gibutyag ni Mulat sa SunStar Superbalita nga tinuig kini nga kalihokan kung diin mismong si Misamis Oriental Governor Bambi Emano gapadala og mga regalo ngadto sa mga piniriso sama sa mga hygiene kits ug nagpa raffle og mga appliances.
Ang lima ka mga electric fan wala na giapil og pa raffle aron magamit kini sa tagsa-tagsa ka mga selda.
Ning tuig, namutos og mga regalo si Misamis Oriental First District Congressman Christian Unabia og gipa raffle ug lakip ang nabunotan makabitbit og P200 gawas niini nanghatag og P1,000 kantidad matag piniriso nga gihatag mismo pinaagi Board Member Bebing Dumadag.
Naghatag sab og mensahe si Board Member Enteng Pelaez.
Pipila ka mga department head ang mitambong sa espesyal nga kalihokan sa mga priso.
Highlights sa programa ang dance contest ug lakip ang parol contest nga kinahanglan gama sa mga indigenous nga mga materyales.
Kung mamatikdan patsada nga mga parol ang gidisplay kon asa gama kini sa mga taklob sa soft drinks, dahon, wrapper sa mga kape ug uban pa.
Natapos ang programa nga puno sa kasadya.