PATAY ang usa ka sakop sa Philippine National Police (PNP), samtang samdan ang usa atol sa nahitabong engkwentro sa probinsiya sa Maguindanao.

Pulis nga napatay giila nga si Police Officer 1 Dennis Sorupia, 29 anyos, ulitawo, ug molupyo sa Aleosan, North Cotabato.

Samdan sab ang kauban niyang si PO1 Muhaimin Ali Mohammad.

Ang duha sakop sa 1508th Police Provincial Mobile Group.

Sa report nga gipagula sa Maguindanao Police Provincial Office, alas 9:00 sa gabii, Marso 14, gisulod sa mga armadong lalaki ang detachment sa mga pulis nga nahimutang kilid sa bodega nga gipanag-iyahan sa pamilyang Ampatuan nga nahimutang sa Bagong barangay Tinimbangan, Mamasapano.

Apan dali sila nga nasiplatan sa mga otoridad mao nga nahitabo ang 20 minutos nga pinusilay.

Abtik sab nga misibat ang mga rebelde dihang nagsing-abot na ang puwersa sa 46th Infantry Battalion sa Philippine Army nga miabag sa mga pulis.

Wala na kaabting buhi si Sorupia human malubngi og bala sa iyang tangkugo samtang samdan si Mohammad.

Sumala pa nga posibleng dunay napatay sa mga armado gumikan sa nagpasad nga dugo sa ilang gi-puwestuhan atol sa pagsulod sa perimeter defense sa mga pulis nga nagbantay sa warehouse ni kanhi Maguindanao Governor Datu Andal Ampatuan.

Dako ang pagtuo ni Maguindanao Police Provincial Director Senior Superintendent Alex Linesses nga posibleng mga sakop sa Special Civilian Volunteer Organization ug Cafgu nga nakig-alayon sa lawless Moro Islamic Liberation Front group ang mga rebelde.

Target nilang sudlon ang warehouse nga posibleng gitaguan sa mga armas ug salapi.

Gilusad na sa hiniusang puwersa sa militar ug kapulisan ang paglutos sa mga armado samtang mihiklin na sab ang gatusan ka sibilyan gumikan sa kahadlok nga sila maipit sa kagubot. (Edgardo Fuerzas)