SUPERBALITA DAVAO

Reyes: Si Hesus ug Santa Claus

Yanong Pagsabot

MABATI na gyod sa palibot ang Pasko tungod sa mga musika ug mga kalihukan sa mga eskwelahan, pribadong kompanya ug sa mga buhatan sa gobyerno nga naghatag na og pinaskuhan sa mga trabahante.

Sa mga eskwelahan, Christmas vacation na ug ang mga estudyante naglaroy-laroy na aron sa paglulinghayaw.

Naghuot na ang mga mall ug mga tindahan kay nagtapok ang katawhan aron ipamalit ang gift certificate nga ilang nadawat alang sa pangandam sa Noche Buena kay mingaw alang sa katawhan nga igsugat sa pasko nga walay makaon sa talad kan-anan.

Si Hesus maoy tinuod nga gasa alang sa kalibutan apan nalahi ang hunahuna sa kadaghanan panahon nga ato kini nga ginasaulog.

Tama ang mga nagahunahuna nga ang diwa sa Pasko mao ang paghinatagay kay gihatag man gani ni Hesus ang iyang bugtong anak diin atong naangkon ang kaluwasan.

Apan, ang mga gasa nga madawat mao na may gihunahuna sa kadaghanan karon.

Dunay uban nga magbagulbol kon gamay ang kantidad sa gasa nga madawat kay dili malipay. Ang uban kay naghunahuna nga magkumbera, mag litson kay panahon sa paglipay ang pasko.

Halos madasigon ang katawhan apil ang mga kabataan kay bisan mamunit lang og bato, mokanta og usa ka kanta pamasko bisan wa nagkadimao sa pagpanaygon unya tiwasan og thank you, thank you ang babait ninyo, ayos na kaayo.

Sa atong mga gipangutana unsay ilang mahinumdoman sa pasko nagkadaiya ang ilang mga tubag. Dunay miingon, nga regalo, pagkaon, Santa Claus, panaygon apan hikalimtan si Hesus ug mas daghan ang naghisgot kang Santa Claus.

Mas gihatagan og pagtagad sa kalibutan si Santa Claus nga kuno manggihatagon hinungdan nga sa imong pagsulod sa mga mall ug dagkong tindahan dunay mga Santa Claus nga nagahatag og regalo.

Mga trabahante nagasuot og Santa hat kay mahinumdom dayon ang katawhan nga panahon karon sa pasko.

Unsay hinungdan niini ug kinsa ang saypan niining tradisyon nga ginasunod sa katawhan sa kalibutan? Daghan sa mga ginikanan ang nagtudlo sa ilang mga anak mahitungod kang Santa Claus nga usa ka buotan, manggihatagon ug matinagdanon sa mga kabataan labi na kon ikaw buotan.

Panahon sa pasko mosuroy si Santa ug manghatag og regalo sa mga bata. Panahon sa gabii mosab-it ang mga bata og puti nga medyas dapit sa bintana kay inig agi ni Santa iya kining sudlan sa iyang regalo ug dili niya labyan.

Panahon sa pagkatulog sa mga bata ang ginikanan maoy maghinayhinay pagbutang sa mga dulaan, kindi ug sa pagmata sa bata ug motanda sa medyas nga gibitay duna na kini sulod nga sa iyang pagtoo gibutang ni Santa Claus.

Sa pagsaulog sa pasko ang ihatagan og dakong pagtagad mao si Santa Claus dili na si Hesus. Ang awit nga atong madungog nagkanayon “You better watchout, you better not cry... Santa Claus is coming to town.”

Panahon sa kalipay ug kadagaya dili mahinumdom ang katawhan kang Hesus nga gihalad, ang pasko nga nagluwas sa sala. Panahon sa kasakit, mga trahedya diha pa mosangpit ang katawhan nga magpakiluoy nga luwason sa katalagman.

Namalandong kaba nganong daghan trahedya miabot sa kalibutan karon? Wala ka ba makaingon nga basin nagpahinumdom na ang Ginoo nga Siya maoy angay daygon, simbahon, ug pasalamatan karong panahon sa haruhay?

Higala, duna bay luna si Hesus sa imong kasingkasing ug hunahuna karong panahon sa pasko?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph