ANG Philippine Institute of Volcanology and Seismology (Phivolcs) mihimakak sa report may kalabutan sa Mt. Apo, labing taas nga bukid sa nasud nga anaa nahimutang sa Mindanao, nga maoy hinungdan sa sunod-sunod nga linog dinhi sa isla.
Sa press conference niadtong Miyerkules, Disyembre 18, sa opisina ni Digos City Mayor Josef Cagas, gihimakak ni Phivolcs director Renato Solidum ang maong kabalaka sa kadaghanan.
“Kung ang lindol dahil sa bulkan. Hindi. Ang lindol dahil sa fault yan. Wala rin ‘yung sinasabi nilang man-made ang lindol,” ni Solidum.
Gihulagway niini nga potentially active ang Mt. Apo.
Niya pa, kung may epekto man ang linog ngadto sa bulkan, di kini moepekto dayon, apan kini mopakita og mga sinyales.
“Kung may epekto man, may signs like pag-iinit ng lupa na matutuyo at mamatay yung mga tanim sa paligid, may paglindol mismo sa bulkan, may lalabas na usok,” matud niini.
Dugang ni Solidum, mobusikad lamang ang bulkan kung may natigum kini nga magma nga andam na niyang ilugwa kung siya man na-trigger sa mga pagtay-og.
Gipasalig sab sa opisyal nga padayon ang monitoring sa Mt. Apo aron kalmahon ang kabalaka sa kadaghanan.
Daghang aftershocks
Sukad mitay-og ang magnitude 6.9 nga linog niadtong Lunes, Disyembre 16, nakatala na og 802 ka aftershocks ang buhatan alas 10 sa buntag, Miyerkules, Disyembre 18.
Pagklaro ni Solidum nga mga pagtay-og nga nasinati karon resulta sa linog niadtong Dominggo, Disyembre 15.
“Most of the aftershocks nangyayari within the day, minsan weeks, minsan buwan. Di natin masasabi when mawawala kasi magdedepende din sa galaw ng faults,” matud niini.
Aminado hinuon si Solidum nga pinasahe ang fault nga anaa sa Mindanao itandi sa Luzon ug Visayas, diin ang mga fault lines dinhi nagsumpay-sumpay sa matag usa. (Rhona Goc-ong-Villariasa)