GIHATAGAN na sa Land Transportation Franchising and Regulatory Board (LTFRB) 7 og provisional authority ang operator sa MyBus aron makasugod na pagbiyahe ang 14 ka bag-ong mga bus niini sa Sugbo.
Ang mga bus mobiyahe gikan sa Dakbayan sa Sugbo paingon sa mga lungsod sa Minglanilla ug Consolacion.
Matod ni LTFRB 7 Regional Director Eduardo Montealto Jr., nga niadtong Martes, Disyembre 17, siya mihatag sa PA.
Base sa authority,13 niini ang modagan gikan sa SM City Cebu paingon sa Anjo World Theme Park sa lungsod sa Minglanilla. Moagi kini sa SM Seaside paingon sa Talisay dayon sa Minglanilla.
Samtang ang usa ka unit mao ang gikan sa SM City Cebu paingon sa SM Consolacion.
Wa pa matino ang detalye sa rota tungod kay gi-update pa sa operator ang petisyon nila nga naaprobahan na kaniadto sa LTFRB 7.
Giklaro ni Montealto nga kining 14 ka bag-ong units sa MyBus nalakip pa sa 77 ka naaprobar nga bus units sa Metro Rapid Transit Services, Inc. niadtong 2017. Dugang sa direktor nga ang petisyon sa pag-amyenda sa route extension gihuwat na lang nila ingon man ang pletehan aron mapublikar na usab kini sa ahensiya.
Una nang nipahibawo si Montealto nga posibleng makadagan na kining mga bus sa di pa mahuman ning tuiga.
Sa Dakbayan sa Sugbo, anam-anam nang nanagan ang mga beep sa mga rota nga naandang gisubay sa mga PUJ.
Tumong niini mao ang paghulip sa karaang mga PUJ, apa n di pa hinuon hingpit mawagtang kini sa kadalanan basta road worthy pa alang sa pagbiyahe.
Nipahibawo usab siya sa publiko nga sugod Hulyo 1 sa 2020, hingpit nang ipatuman ang automatic fare collection system alang sa mga modern public utility vehicles.
Kini nagpasabot nga cashless ug card na lang ang gamit sa pagbayad sa plete. (HBL)