HUMAN nagmalampuson sa ilang kampanya sa 30th Southeast Asian (SEA) Games, ang Team Philippines midawat sa prestihiyosong Order of Lapu-Lapu sa Malacañang Palace, Miyerkules.
Mismong si Presidente Rodrigo Duterte mihatag sa maong pasidungog sa 600 ka Filipino athletes gikan sa 56 ka isports, nga nagtinabangay aron mabutang sa unang pwesto ang Pilipinas sa labing dako nga sportsfest sa Asean region.
Ang Order of Lapu-Lapu ginahatag ngadto sa kinsa mang nakahimo sa “extraordinary acts of service” ug “exceptional contributions” sa nasud.
“We are lucky to have a President who support us fully and has a big heart for our athletes,” pahayag ni Team Philippines Chef de Mission ug Philippine Sports Commission Chairman William Ramirez atol sa courtesy call diin mga atletang may medalya midawat sab sa ilang cash incentives gikan sa gobyerno.
Ang Team Philippines sa 30th Sea Games nanghakot og 149 gold medals, 117 silver ug 121 bronze.
Ni Ramirez nagmalampuson ang Team Pilipinas tungod sab sa suporta sa gobyerno, taas nga allowances, mas nindot nga pasilidad, bag-ong ekipo, trainings ug uban pa.
Anaa atol sa seremonya sila Executive Secretary Salvador Medialdea, Philippine Olympic Committee president ug Cavite representative Abraham Tolentino ug Philippine Southeast Asian Games Organizing Committee chairman ug Speaker Alan Peter Cayetano.
Present sab sila PSC Commissioners Charles Maxey, Arnold Agustin ug Celia Kiram uban ang mga opisyales sa nagkadaiyang national sports associations.
Ubos sa balaud ang gold medalists sa SEA Games modawat og P300,000 gikan sa gobyerno pinaagi sa PSC ug Philippine Amusement and Gaming Corporation samtang ang nakasilver ug bronze, dunay P150,000 ug P60,000.
Apan tungod nalipay sa performance sa mga atleta, si Duterte midugang og P250,000 nga bonus ngadto sa gold medalists, P150,000 sa naka-silver, ug P100,000 sa bronze. (PR)