USA ka fund raising concert ang gihimo karon, diin tumong niini nga makapaambit og tabang sa mga nabiktima sa magnitude 6.9 nga linog niadtong Dominggo, Disyembre 15, dinhi sa Mindanao.
Ang konsiyerto langkuban sa mga local artists nga nagkahiusa ang tumong nga mopadayag og ayuda sa mga nanginahanglan.
Ang fundraising concert nga #StrongerMindanao himuon karong adlawa, Disyembre 20, Biyernes, 6 p.m. sa SM City Ecoland (Annex) Activity Center.
Bukas ug libre sa tanan ang aktibidad.
Apan gidasig kadtong moadto nga magdala og bisan unsang donasyon, sama sa trapal, canned goods, mosket, tubig, cash donations, ug uban pa.
Mga local artists nga mohatag lingaw langkuban nila Asia’s Got Talent Season 2 finalist ug Filipino pride beat boxer Neil Rey Garcia Llanes; Social Media Influencer Weigibbor Labos; Mindanao artist Popong Landero; bandang Nairud; Tamad si Juan, Angelo Pineda, Maan Chua, Isla Houdini, ug Chito Samontina.
Ang programa, i-host sab ni Joey Sy-Dominggo.