DILI na mapugngan ug moabot na gayud ang bugnong lugaynon karong Mayo 10, 2010. Matud pa sa Commission on Election (Comelec) nga andam na sila sa mga tawo ug kahimanan alang sa nasudnon ug lokal nga piniliay. Lakip sa ilang gipangandaman mao ang pagamit sa computers sa first automated elections.
Sa laing bahin, wala sab magpaiwit ang simbahan sa iyang tulubagon sa pagpangandam sa iyang mga gingsakpan sa umaabot nga piniliay.
Sa nangaging mga eleksiyon, ang simbahan manawagan gilayon og mga "Political Education" aron magiyahan ang katawhan sa ilang botohan. Apan lahi karong panahona. Ang mga kaobispohan nga sakop sa CBCP naghimo og kaugalingong pagtuon sa panghitabo sa nasud ug nakahukom nga mopaguwa og Pastoral Letters kabahin sa eleksiyon sa Mayo 2010.
Duha niini, giulohan og "CBCP Pastoral Statement on Lay Participation in Politics and Peace" ug ang "A Call for Vigilance and Involvement" nga gilagdaan ni Bishop Nereo Odchima, CBCP President.
Ang ikaduhang sulat nag-awhag sa tanang Pilipino nga magporma og Circles of Discernment aron makakita, motimbang-timbang ug molihok (see, judge and act) subay sa gihuptang moral values ug mga pagtulun-an sa atong simbahan.
Sumala pa sa mga kaobispohan nga dako ang atong tulubagon sa kasamtangang panghitabo sa atong nasud.
Ingon pa nila "If we are what we are today, a country with a great number of poor and powerless people...one reason is that we have allowed politics to be debased and prostituted in the level today."
Busa isip tubag niini, ang Archdiocese of Davao naglusad sa Spirituality: Circles of Discernment for Elections (CiDE).
Ang mga katuyoan niini mao ang mosunod: maamgohan mismo sa mga parokyano ang matuod nga hulagway sa politika sa nasud; motaas ang pag-ila sa mga kandidato; mogiya sa papel ug misyon sa layko sa politika subay sa espirituhanon, moral ug sosyal nga pagtulun-an sa simbahan; ug, masaulog ang kaanindot sa kinabuhi sa panag-ilhanay ug panaghigalaay.
Nanawagan ang CBCP nga magporma og Circles of Discernment sa matag parokya ug GKKs isip iyang kongretong tampo sa pag-usab sa katilingban. Nanawagan usab kini nga magmaigmat tungod sa kabag-o sa paagi sa eleksiyon karon gamit ang automated counting machines aron mahimo kining instrumento sa kamatuoran ug kaayohan inay nga magamit kini sa dautang katuyoan ug interes sa pipila.
May panawagan usab kini sa mga kandidato nga ilhon ang kasagrado sa balota ug ang ilang kaakuhan sa tanang katawhan nga mas labaw pa unya sa ilang personal nga interes kon modaug na.
Sa katapusan, nanawagan usab ang CBCP sa tanang Peace-keepers sama sa mga kapulisan ug kasundalohan nga magbaton sila sa kaisog sa pagsumpo sa dautan ug pagbarog sa kamatuoran ug dili magpagamit sa interes sa pipila.
Sa laing bahin, nag-awhag usab ang CBCP nga usbon na unta nato ang karaang paagi sa politika sa nasud nga matud pa nakapakgang sa iyang kalamboan. Ang politika nga ilang gihulagway nga usbon mao ang Politics of Personalities, Politics of Patronage, ug Politics of Pay-off.
Unta mahulipan kini sa Politics of Principles, Politics of Performance, ug ang Politics of Programs, Projects and Services.