SUPERBALITA CEBU

Seguridad sa pier, airport plantsado na

HAN-AY na ang mga pamaagi ug seguridad nga ipatuman sa nagkadaiyang ahensya sa gobyerno ubos sa Department of Transportation (DOTr) sa pagdagsa sa mga pasahero sa mga pantalan, terminal ug tugpahanan sugod karong adlawa, Disyembre 20.

Kini ang gipahibawo sa Land Transportation Franchising and Regulatory Board (LTFRB)-7, Land Transportation Office (LTO)-7, Phil Coastguard (PCG)-7, Maritime Industry Authority Marina-7, Maritime Police, Civil Aviation Authority of the Philippines (CAAP), Cebu Port Authority (CPA), Office for Transportation Security (OTS) ug kadagkuan sa Mactan Cebu International Airport Authority (MCIAA) atol sa panagtigom sa Regional Management Council (RMC)-7 nga gilangkoban sa naasoyng mga ahensya diin ilang gihisgotan ang pagpatuman sa Oplan Biyaheng Ayos karong pasko ug bag-ong tuig.

Ang RMC-7 kasamtangan na karong naka heightened alert.

Matod ni Steve Dicdican ang vice chair sa RMC-7 ug General Manager sa MCIAA nga sugod karong adlawa hangtod sa liwas na sa bag-ong tuig gipaabot nga mosaka ang mga pasahero nga modagsa sa MCIA ug 20 porsyento.

Busa giawhag ni Dicidican ang mga pasahero sa pagsayo gayud sa pag-adto sa tugpahanan sa dili pa ang ilang schedule nga biyahe gumikan kay gipaabot ang kuti nga proseso sa check-in pa lang sa tugpahanan.

Duha ka oras sa dili pa ang flight matod pa ang angayang igahin sa mga pasahero sa domestic flights sa ilang pag-abot sa airport samtang upat ka oras usab sa international flights aron dili malangay sa pag-check-in.

Sagad sa mga oras nga dasok ang tugpahanan sa mga pasahero mao ang panahon sa udto ug tungang gabie.

Wala hinuoy nadawat nga hulga sa seguridad ang kadagkuan sa MCIAA karong nagsingabot ang pasko.

Samtang gipaniguro ni Dicdican nga hagbay ra usab nila nga gipatuman ang no certificate no entry sa mga karne ug produktong baboy gikan sa Luzon ug sa Rehiyon 8 ning bag-ohay lang subay sa kamandoan ni Gobernador Gwendolyn “Gwen” Garcia aron masigurong walay African Swine Fever ASF nga makalusot diri sa Sugbo nunot usab sa ka busy sa tugpahanan pag-atiman sa mga pasahero.

“Atong mga terminal nuon you can enjoy and spend time there and it’s really best and stress free if you go early sa help desk daghan man mga agency nga moapil ana naa pud tay malasakit desk with malasakit kits kay for instance dugay inyo biyahe you want some water and assistance pwedi ramo mo-drop by bisag you are not feeling well naa pud tay mga doktor,” matod ni Dicdican.

Ang LTFRB-7 mipahibawo nga sugod usab karong adlawa magmuntar na sila ug help desk sa mga terminal ug molungtad kini hangtod sa Enero 3 sa sunod tuig.

Subsub ang ila unyang ipahigayong inspeksyon sa mga colorum nga mga bus ug ingon man ang overloading.

Gipaniguro sa LTFRB nga bisan paman sa dagsa sa mga pasahero sa terminal wala gayud silay tugotang maka overload nga mga bus gumikan kay ang kaluwasan sa mga pasahero ang ilang prayoridad.

Aduna na silay mga special permit nga giandam alang sa mga bus nga molabyog sa dili ilang rota kun ugaling magkuwang ang mga bus.

Sa bana-bana ni Eugenio Ibo Jr. Sa LTFRB-7 nga gipaabot nga modoble ang 25,000 ka mga tawo nga sagad modagsa sa mga terminal matag adlaw sugod karong adlawa.

Dili hinuon kaayo kini grabe itandi sa pagsugwak sa pasahero panahon sa Kalag-Kalag base sa ilang kasinatian.

Nunot sa pagdagsa sa mga pasahero gipahimangnoan sa LTFRB-7 ang publiko sa pagbantay sa mga taxi driver nga magpamahal sa ilang presyo o ba kaha dili magpasakay sanglit dako kining kalapasan sa lagda sa ilang buhatan.

Giawhag nila ang mabiktima sa naasoyng mga binuang sa pagtaho sa ilang buhatan arin masilotan ang taxi driver.

Amg Philippine Coasguard PCG-7 sa ilang bahin mibutyag usab nga bisan sa mga barko wala usab silay gitugotan nga maka overloading.

Sugod pa niadtong Diayembre 16 ila nang gipatuman ang Oplan Biyaheng Ayos sa mga pantalan ug molungtad kini hangtod sa Enero 5 sa sunod tuig.

Sa banabana sa PCG-7 gipaabot nga mosaka og 200 porsyento ang gidaghanon sa mga pasahero nga modagsa sa mga pantalan gikan sa naandang moabot sa 5,000 ka mga pasahero matag adlaw.

Gikatakdang mokatap ang PCG-7 ug mga K9 unit sa mga pantalan aron masigurong walay buot mobuhat ug binuang sa pantalan nunot niining pagdagsa sa pasahero.

Ang Maritime Police miawhag usab sa publiko sa pagbantay sa ilang mga butang sanglit aduna silay nasakpang posibleng sakop sa mga sakop “budol-budol” gang niadtong miaging semana nga nagpa karon ingnong mga “seksing” babaye nga nakabiktima ug ubang pasahero.

Ila na hinuon nangasikop ang duha niadtong maong grupo ug gipasakaan ug tukmang kaso.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph