DUHA ka mga holdupper napatay, usa nasikop human nakigpinusilay sa nagbinugtong nga off-duty nga pulis sa Dakbayan sa Mandaue sa Huwebes sa kaadlawon, Disyembre 19, 2019.
Gipapugngan sa Mandaue City Police Office (MCPO) ang ngan sa ilang sakop alang sa seguridad niini.
Ang pulis diha sa dapit nga gipuy-an sa babayeng tulison unta sa tulo ka mga lalake hinungdan nga nakaresponde gilayon human makadungog sa singgit.
Si P/SSgt. Richard Cabello, imbestigador sa kaso nga nahinabi sa Superbalita Cebu, niingon nga ang biktima nga si Jancyn Cullano, 30, naglakaw sa Albaño st., Brgy. Maguikay, Mandaue City, paingon sa giabangan nga balay.
Pag-abot niya sa tugkaran sa balay, nahibong siya nga adunay nag-atang nga tulo ka mga lalake nga nagsakay sa usa ka motorsiklo.
Pag-abli sa biktima sa iyang purtahan, ang usa sa mga suspek nga si RJ Sumatra, 24, lumad nga taga Tangub City, niilog sa bag ni Cullano ug giingnan nga “tulis ni”.
Samtang ang duha ka mga kauban ni Sumatra nga silang Louie Singwatt, drayber, lumad nga taga Iligan City ug si Marlon Carlos, 39, backrider, taga Sanciangko St., Cebu City, nagtambay ra sa motorsiklo isip lookout ug backup.
Atol sa pag-inilugay nila ni Sumatra ug Cullano sa bag, ang biktima nisiyagit og tabang hinungdan nga ang usa ka off-duty nga pulis nga nibisita sa iyang higala sa dapit ug anaa ra duol, nakabantay sa komosyon ug niresponde dayon.
Sigon ni Cabello nga mobadlong lang unta ang off-duty nga pulis, apan sa pagkamatikod nila ni Singwatt ug Carlos sa presensya sa pulis, giunhan kini nila sa pagpabuto hinungdan nga mibawos ang pulis
Dugang ni Cabello nga anaa sa “vantage position” ang pulis hinungdan nga na-pinned down niya ang duha ug napatay sa pinuisilay.
Atol sa engkwentro, gikuha ni Sumatra ang natagak nga pusil ni Carlos ug midagan paingon sa M.Ceniza st., Barangay Maguikay, nga wa madala ang bag.
Adtong higayona, daling natawagan ang Mandaue City Police Station 4 ug daling nakaresponde sa dapit hinungdan nga nakorner si Sumatra ug nadakpan.
Gitan-aw nga anggulo sa kapulisan nga apil ang mga suspek og usa ka robbery group tungod kay aduna kini mga kontak sa gituohang mga buyer sa ilang makuha nga mga gamit susama sa selpon.
Gibase kini nila sa nadiskobrehan nila sa mga selpon sa mga tulisan.
Apan giklaro sab ni Cabello nga bisan pa man nga ang duha ka mga suspek gikan sa Tangub City ug Iligan City, dapit nga gigikanan sa mga robbers sa JCenter Mall, ang duha way kalabotan sa maong grupo.
Sa pagkakaron, si Sumatra anaa na sa kustodiya sa MCPO Station 4 ug ang duha ka suspek nga napatay anaa sa Cebu Rolling Hills aron ipaubos og autopsy examination.