NAGTINGUHA si Presidente Rodrigo Duterte nga dugangan ang monthly allowances sa mga atleta ug uban pang gastuhan sa preparasyon sa Pilipinas alang sa 2020 Olympics.
Mao kini ang gipabuhagay ni Duterte sa iyang mensahe atol sa pag-courtesy call sa Pinoyng mga atleta nga nakalangkat og mga medalya sa bag-uhay lang nahuman nga 30th Southeast Asian Games sa Malacañang Palace niadtong Miyerkules, Disyembre 18, 2019.
Atol sa courtesy call, gipanghatag ni Duterte ang cash incentives ngadto sa mga atleta ug hasta ang pasidungog nga Order of Lapu Lapu.
Matod ni Duterte nga makighugpong siya sa Kongreso aron pasakaan ang matag buwan nga allowances sa mga atleta.
Ang gikonsiderar nga elite athletes o taas og kalidad nga mga atleta kasamtangang nagdawat og P45,000 nga allowance matag buwan.
“I’ll try to talk things over with Congress,” asoy ni Duterte nga napatik sa Spin.ph. “Sana ‘yung allowance ninyo, dapat ‘yung pagkain, libre na. ‘Yung allowance ninyo, allowance na ninyo ‘yan.”
Nidugang si Duterte nga gusto sab niyang madugangan ang gigahin nga pundo alang sa kampanya sa nasod sa 2020 Olympics pinaagi sa Philippine Amusement and Gaming Corporation (Pagcor).
Nanghinaot si Duterte nga masumpayan ang maayong gipakita sa Pinoyng mga atleta sa 30th Seag diin naangkon pagbalik sa Pilipinas ang overall title.
“I heard we are giving P100 million for the Olympics. Puwede tayo magdagdag?” matod ni Duterte dayong lingi kang Pagcor chairman ug chief executive officer Andrea Domingo.
Ang Pilipinas nakahakot og 149 ka gold medals, 117 ka silver medals ug 121 ka bronze medals sa miaging Seag nga gipahigayon sa nasod.
“’Yung isang paa ko, laylay na,” sagol komedya nga asoy ni Duterte. “Kaka-semplang ko lang sa motor pero sa harap ng mga athletes, walang sakit-sakit. Pero kanina, mahihimatay na ako.”
Ang matag gold medalist adunay cash incentive nga P300,000 gikan sa gobiyerno, P150,000 sa silver ug P60,000 sa bronze. (ESL)