KINAHANGLANG butangan og priority lane kon dapit diin maglinya ang mga senior citizen, PWD ug mga mabdos nga mosakay og taxi. Anaa man guy ubang mga mall ug supermarket nga anaay gigahin nga priority lane apan mosagul man ang ubang mga tawo. Maayo lang kon ang mga dispatcher sa maong tindahan ang mopa-una sa mga gitagan-an sa maong priority lane. Kon wala kining priority lane og magkasagul ang tanang mga pasahero pa-ugatay ang resulta. Ma-uwaw usab ang mga senior citizen, PWD ug mga mabdos nga mo-una sa pagsakay sa uban nga dugay nang nag-atang og kasakyan.
Kinahanghlan gayud nga himu-an og ordinansa, kon wala pa, kining pagbutang og priority lane nga ila-in gayud sa ubang mga pasahero.
•••
Daghan na usab ang nangreklamo niining pagbalik sa left turn sa Almendras Street, Bgy. Kasambagan, Cebu City. Mao kini ang nakadala og grabeng trapik sa maong dapit tungod kay mababagan man ang mga sakyanan gikan sa norte (Mandaue City) sa mga behikulo nga mo-left turn sa may dan Almendras. Naa man untay laing maagi-an ang maong mga sakyanan ambut og nganong anha man gayud diha sila paagi-a? Attention Cebu City Transportation Office (CCTO)! Nakakita ba kamo niining maong problema?
•••
Uyon ako niining resolusyon nga gipasar sa Cebu Provincial School Board nga nag-awhag sa Department of Education (DepEd) nga English na maoy gamiton nga medium of instruction alang sa school year 2020 – 2021. Sukad gipatuman ang K-12 program ang mga public school migamit sa Mother Tongue-Based Multi Lingual Education (MTB-MLE). Kini mao ang pagamit sa local nga lingwahe, kon Cebuano dinhi sa ato, gikan sa kindergarten, Grade 1 ngadto sa Grade 3. Tagalog gikan sa Grade 4 ngato sa Grade 6 ug English gikan sa
Grade 7 pataas.
Wala kini kinahanglana tungod kay kon sa local nga pinulongan ato man kini kanunay nga gigamit sa atong panimay. Daghan usab nga mga tawo nga lihiro kaayo mo-Tagalog tungod sa pagtan-aw og telebisyon. Wala lang tingali grammar. Ang English maoy daku kaayo og matabang sa mga estudyante. Tungod sa English sayon alang kanila ang pagbasa ug pagtuon sa mga libro nga gamiton sa college labi na sa pagsabut sa sa instructions sa board ug bar examinations. Alang kanako kining pag-usab-usab sa atong paagi sa pagpanudlo sa public schools makahatag og dili lamang kahasul sa mga estudyante ug sa mga ginikanan apan makadugang usab kini sa galastuhan nila. Madato og samut ang tig-imprinta og libro niini. Daghan usab hinuon ang makasapi pinaagi sa pagpamalit og bag-ong mga libro. Hinaut pang ang Cebu City, Mandaue City ug Lapu-Lapu City mosunod usab sa Cebu Provincial School Board pinaagi sa pagpasar og resolusyon aron pagamit sa English nga medium of instruction sa ilang tagsa-tagsa ka mga siyudad. (mannyrabacal1144@gmail.com)