NAPALIG-ON na ang Republic Act 11313 kun Safe Spaces Act human nipasar ang Cebu City Council sa ordinansang “The Safe Streets and Public Spaces Ordinance of Cebu City.” Ang Safe Spaces Act napasar niadtong 2018, apan wa mapatuman.
Ang balaud ug ordinansa magsilot niadtong mga tawo nga naandan nila nga managhoy kon dunay mauyonan nga babaye nga ilang makit-an. Ang taghoy klaro nga dunay pataban nga sexual nga tuno ug pagtan-aw ngadto sa babaye nga natumngan. Klaro nga binastos ngadto sa babaye.
Apil sa kalapasan kadtong mga komentaryo sa lalake ngadto sa babaye sa publikong mga lugar sama sa PUJ ug bus. Bug-at kini og silot labina ngadto sa mga driver ug operator kon sila ang maghimo niini nga kalapasan sa balaud.
Karon nga duna nay ordinansa niini ang Siyudad sa Sugbo, mas mapatuman na kini dinhi sa siyudad. Kadtong mga lalake nga hilig managhoy, manulti og bastos sa mga babaye nga igo rang moagi ug makit-an, ingon man niadtong motutok nga ang tinan-awan klarong binastos, makiha ug masilutan na. Ang ordinansa maoy nagpalig-on sa ngipon kay ma-localize na ang pagpatuman sa balaud.
Maayo ni nga tambal niadtong mga lalake nga way lingaw kon di ang pagbinastos ngadto sa mga babaye.
Masilutan na usab kadtong mga tawo nga kusog nga mohimo og sekswal nga bugalbugal ngadto sa mga babaye ug third sex. Kay naa ra bay ubang mga lalake nga grabe makabugalbugal ngadto sa mga babaye ug third sex nga sama og ila nang gihuboan ug giabusuhan atubangan sa publiko.
Karon nga naa na ning ordinansa, hinaut pang matuldokan ang buhat sa mga pagbinastos.
Karon, ang bola naa na sa mga awtoridad ug sa mga hingtungdan sa pagreklamo. Naa na may ordinansa ug nasudnong balaud, angay nang tudloan og leksyon ang mga bastos.