NUMERO UNO. Di ma-lalis ug di na kadudahan ang pagka Numero Uno ni Manny Pacquiao nga boksidor sa tibuok kalibutan human niya gipukan si Joshua Clottey niadtong Domingo.

Si Joshua Clottey hapit matumba sa una pa lang nga round. Mao nga sa sunod nga mga round nagsige na lang siyag tabon sa iyang nawong sa iyang gloves. Mora na hinuon og punching bag si Clottey ni Manny Pacquiao.

"The Manny Pacquiao Blog". Click here for stories and updates on the Filipino boxing champ.

Si Clottey ang hinungdan sa way ayo nga away. Hinuon di sad nato mabasol si Clottey kon nahadlok siyang malukapa ni Pacman. Si Clottey nakadawat gihapon sa ganti nga US$1.5 milyun bisag way ayo iyang away.

Tungod ning iyang bag-ong kadaugan sa boksing, mosamut ang pagtuo ni Pacman nga dako ang iyang tsansa nga modaug pagka kongresista sa Sarangani sa Mayo 10 nga piliay.

Sa interbyo, miingon si Manny nga unya na siya modesidir sa gikahinaman sa tanan ug tibuok kalibutan ang iyang away unya batok ni Mayweather human sa piliay sa Mayo 10.

Kon mahitabo nga modaug si Pacman pagka kongresista, sa akong tan-aw siya ang pinaka-unang boksingero sa kalibutan nga nahimong pulitiko ug mag-babalaod. Sa ato pa, di na siya mopadayon sa boksing?

Kay kon mopadayon si Manny gihapon sa iyang pagka boksingero bisag kongresista na siya dako unyang kataw-anan inigtawag sa iyang ngan sa tig-anunsyo. “In the blue corner wearing red trunks, the champion of the world from the Sarangani, Philippines, the Honorable Congressman, Manny “Pacman” Pacquiao…..”

Wa tingali dautan kon mahitabo na. Apan di ba makauuwaw man paminawon nga kongresista na si Manny unya mopadayon lang gihapon siya sa larangan sa boksing?

Bisan pa sa imong pag-apilapil sa pulitika Pacman ikaw gihapon ang kampeon sa tibuok kalibutan ug dakong garbo sa atong nasud.

Mabuhay ka congressman este Pacman!

****

INUTIL? Maayo ang gibuhat sa Comelec sa pagpahibawo sa katawhan labina ni Cardinal Vidal nga ang pagdawat sa donasyon gikan sa mga pulitiko sa panahon sa piliay usa ka salaud.

Apan gukuron ba gyud sa Comelec si Cardinal Vidal ug ang pulitiko nga mihatag sa donasyon sa simbahang Katoliko alang sa katilingbanong buhat? Sa akong tan-aw morag maayo man lang sa yawyaw ang Comelec.

Unta kon tinuoray pa ang Comelec sa ilang trabaho, gipadalhan nila og summons si Cardinal Vidal aron pagtubag sa kiha tungod sa iyang pagdawat sa donasyon gikan sa kandidato una sila mipagawas og estorya.

Apan giuna man sa Comelec ang estorya usa ang kiha. Dako kog pagduda nga di pasakaan og sumbong si Cardinal Vidal sa maong isyu. Kon ang regional election officer di katoliko tingale iyang pasakaan og sumbong si Cardinal. Maayo sad tingale nga pangutan-on ang Comelec kon kanang pangpahatag ni Mayor Tomas Osmeña og kwarta sa senior citizens, high school graduates ug sa mga bakol ning panahon sa piliay di ba supak sa lagda ug balaod sa piliay?

Sa miaging pipila ka adlaw, mora lag mikuot si Mayor Tomas sa iyang kaugalingong bulsa og kwarta nga iyang gipanghatag ngadto sa nagkalain-laing sektor sa dakbayan sa Sugbo. Basi sa atong balaodnong kriminal, ang paghatag og kwarta o bisan unsang butang aron lang pagdani sa usa ka tawo nga mobuhat sa iyang gustong ipabuhat usa ka salaod nga atong gitawag nga “bribery”.

Wa ka mahadlok ang mga opisyales sa Comelec dinhi’s Sugbo kay wa man gyud sila mosulti nga ang gibuhat ni Mayor Tomas sa pagpanghatag og kwarta sa panahon sa piliay usa ka salaod? elespinoza53@yahoo.com)