GIKALIPAY sa kadagkoan sa National Union of Journalists in the Philippines (NUJP) human nga "guilty" ang hukom batok sa mga akusado sa Maguindanao massacre sulod sa usa ka dekada nga pagpaabot.
Gibutyag ni Pamela Jay Orias, tsirman sa NUJP-Cagayan de Oro Chapter, nga kini sinugdanan pa lamang ug pwedi pa nga mo-apelar apan ang importante nahukman na nga "guilty" ang mga Ampatuan sa pagpatay sa 58 ka mga inosenteng kinabuhi.
"This is only the beginning, as the accused may file motion of appeal. But what is important now that the facts have been established that the Ampatuans who are accused are guilty of killing 58 innocent lives," pahayag ni Orias.
Gidugang pa ni Orias nga kini ang unang lakang ug nagpasabot lang nga naglihok pa gihapon ang justice system sa nasud.
"This is a first step, and a precedent nonetheless, that the justice system worked for the people, especially on media workers and journalists who were killed," dugang pa.
Nanghinaot usab kini nga magsilbing inspirasiyon alang sa mga sakop sa media nga napatay aron nga makab-ot ang hustisya.
Kahinumdoman nga nahukmang "guilty" si Datu Zaldy Ampatuan ug mga kauban pinaagi na usab ni Quezon City Regional Trial Court Judge Jocelyn Solis-Reyes niadtong Disyembre 19 adlaw nga Huwebes.