NAPAINGON karambola ug kagubot ang pagpahigayon og clearing operation sa mga personahe sa Roads and Traffic Administration (RTA) human nga nagmagahi ang mga vendors niadtong Disyembre 18 sa hapon diha sa Cogon, siyudad sa Cagayan de Oro.
Lagom sa mata ang naangkon sa babayeng traffic enforcer samtang bun-og usab ang mga kauban niini human gipangsumbag ug gipangsipa sa mga vendors.
Gibutyag ni Antonio Resma Jr., focal person/spokesperson sa City Composite Road Clearing, nga nagkarambola atol sa ilang clearing operation human nagmagahi ug nanukol ang mga vendors dihang igo lang nagpatuman sa balaod ang RTA ug clearing team.
Ang mga vendor gitugotan nga makapamaligya sa alas 6:00 sa gabii apan alas 4:00 pa lang sa hapon duna nay namaligya hinungdan sa gipahigayon mga operasyon.
"Una nag-confiscate man gud to naay nisukol nga kadtong tag-iya siguro, I don't know moingon man pud ang vendors mga dili nila kauban, looy ang enforcer intawn babae raba na black eye kay gisumbag man gyud sa nawong mao to nakasugod sa commotion," matud ni Resma.
Gidugang ni Resma nga tanan nga mga membro sa RTA ang nabun-og human gitabangan.
"Actually, the whole team kay gitabangan man gud, mao lage naay nagsugod ang uban kalit lang dayon ma-identify kay naka uniform mosingit lang og sumbag, mosipa kalit, naay uban man gani didto gadala na og tubo gibunalan, dili gyud maayo," dugang pa.
Gi-andam na ang kasong posibleng ipasaka sa mga suspetsado ilabi na kung maila kini. Naghangyo usab ang tinugyanan sa lokal nga kagamhanan sa siyudad ngadto sa mga asosasyon nga kung naila ang mga responsable ilabi na ang nag-una sa maong kagubot nga itahan ngadto kanila aron mapasakaan sa tukmang kaso.