HELLO sa akong mga higala ug kapamilya sa sa siyudad sa Cagayan de Oro (CDO) ug sa akong kabanay sa Panabo City ug tibuok rehiyon onse! Maayong Pasko!
Ubayubay gayud ang grasya nga akong nabati kay nadungangan na pod ang akong timbang hu hu! Bitaw, grasyoso gayud kaayo ang Ginoo nga nagapadayog bubo sa grasya kanako ug sa akong pamilya.
Salamat pod sa mga nahimong sandayong sa mga panalangin sama sa SuperB, kay mare ug pare, akong friends ug siyempre ang akong family ilabi na sa akong ate nga si Sheila nga walay pugong sa gasto alang sa ikalipay ug ikaayo namo.
Kung susama mo kanako nga seryoso sa trabaho bisan tangaon ug kugihan (gamay- depende sa mood), mangita gayud kung panahon nga maka “unwind” o “makarelaks pagkahuman sa trabaho o tensyon,” igsuon.
Pinaagi lamang sa giya, kusog, kaalam ug grasya sa Ginoo nga nahimong malampuson ang panagtigum sa mga opisyal sa mga solo parent sa kwarenta (40) ka mga barangay sa tibuok syudad sa Panabo, Disyembre 8.
Mora og simple ra kato nga panagtigum apan nakulata kaayo ang akong kalawasan sa kahago sa mga butang nga personal nakong giandam uban ang mga kugihang opisyal ug volunteers sa Panabo Solo Parents Federation.
Nanginahanglan gayud og pahulay ang akong nakapoy nga kalawasan busa ang Dios sa kalangitan gitugot nga makabakasyon ako sa CDO aron esponsoran sa akong ate nga si Sheila ug iyang bana nga si Mario Aguila ang paglaag nako sa “Ultra Winds Mountain Resort” sa Pualas, Bukidnon.
Nindot kaayo ang mga talan-awon didto. Ang mga halaman, mananap o kahayopan, swimming pool, restaurant, dagkong function room, kuwartong tuluganan ug uban pa, makawagtang gayud sa stress, kahago sa lawas ug mga gihunahunang mga problema.
Ang tubig pa gayud nila natural nga alkalina nga nagaagi sa mga bato diin adunay mga mineralis nga nindot alang sa kalawasan nato.
In short, nakabawi ug mas ninglaskig na ning inyong higala maong mora’g pwede na pod mokiat ESTE... mamugas sugod January, higala, hallelujah!
Bitaw, karon holiday season, dili nato kalimtan maggahin og panahon nga makapahulay ug makabawig kusog gikan sa adlaw-adlaw natong pagpaningkamot.
We deserve to rest and enjoy life. Dili pod nato kalimtan mamalandong aron mas klaro ang atong direksyon karong tuig 2020, igsuon.
Siyempre, ang star sa Pasko kay si Kristo, dili ang mga part, bonus o regalo. Pasalamatan nato ang Diyos sa gasa sa kinabuhi ug kaluwasan nga atong nabatunan pinaagi lamang sa sakripisyo ni Hesu-Kristo.
Merry Christmas po!