MAGPET, North Cotabato -- Patay sa lala ang usa ka 8-anyos human gipaak og cobra alas 4:30 sa hapon niadtong Huwebes, Disyembre 19.
Giila ang biktima nga si Renante Via Jr., ug nagpuyo sa Sitio Boay-Boay, Barangay Basak sa maong lungsod.
Gibutyag ni Liza Via, iyaan sa bata, nga samtang sakay sa kabaw sa iyang amahan gikan sa uma ug pauli na unta sa ilang balay, apan pag-abot niini sa lati nga bahin sa Sitio Boay-Boay, mikanaug siya kay nahulog ang iyang tsinelas.
Apan kalit lang gipaak ang abaga ni Via og bitin nga dunay gitas-an nga walo ka tiil.
Gitabang ang biktima sa iyang amahan ug gidala ngadto sa balay tambalanan sa Magpet apan wala na kini kaabot nga buhi gumikan mikatag na ang lala sa bitin sa iyang lawas.
Nagtuo ang pamilya sa bata nga King Cobra ang mipaak sa biktima gumikan sa kataas sa halas.
Kahinumdoman nga niadtong milabay nga tuig, dunay namatay sab sa Makilala nga giingong gipaak og King Cobra o Banakon. (Edgar E. Fuerzas)