MGA estudyante ug drayber sa school van sa usa ka pribadong eskwelahan sa Dakbayan sa Mandaue nalimbuwad human nabanggaan sa Army truck alas 6 sa buntag sa interseksyon sa M. Logarta st. ug R. Cabahug st., Mabolo, Cebu City.
Angol ang siyam ka mga estudyante, drayber ug asawa sa drayber.
Base sa inisyal nga imbestigasyon, sigon ni Police Chief Master Sgt. Jodito Dinglas, traffic investigator sa Mabolo Police Station, nga ang school van gikan sa SM Cebu padung sa M. Logarta st. paingon sa Mandaue City.
Ang army truck gikan sa R. Cabahug padulong sa Ziamen st. paingon sa APM mall.
Pagsugat sa van ug truck, ang luyo nga bahin sa school van naigo sa truck ug sigon ni Dinglas nga tungod sa impact, nalimbuwad ang van.
Sa pakighinabi Sunstar Cebu sa Army truck driver, Staff Sergeant Andres Rumbines Jr., sa wa pa mahitabo ang pagbangga, gikan siya kauban ang 15 ka mga sundawo, nga nag-security sa Sta. Rosario Church ug sa Basilica del Minore del Santo Niño de Cebu atol sa Misa de Gallo.
Human sa Misa de Gallo, padulong na sila mopauli sa kampo ug miagi sa North Reclamation Area sa R. Cabahug St.
Niadtong higayona, nakakita sya sa school van nga kusog nga nagdagan gikan sa SM Cebu.
Siya niangkon nga kusog sab ang iyang padagan nga niabot og 50 kilometers per hour.
Ang interseksyon way stoplight ug atong orasa way naka-duty nga traffic enforcer.
Dugang niya nga wa niya tuyoa ang nahitabo ug tungod lang nga wa sila naghinatagay kon kinsa ang mouna, hinungdan nga pag-brake niya sa Army truck, nabanggaan ang luyo nga bahin sa school van hinungdan sa pagkalimbuwad niini.
“Kon nagdiretso sana ako, may posibilidad na ako ang nabangga,” sigon ni Rumbines.
Si Rumbines drayber na sukad 2001 nga sibilyan pa siya hangtod na nga nisulod na siya sa Army.
Human sa panagbangga, gitabangan nila si Rumbines ug iyang mga kauban nga sundawo ang mga bata ug drayber nga makagawas sa sakyanan.
Dali sab niresponde ang mga ambulansya nga nagdala sa mga naangol sa Chong Hua Hospital Mandaue.
Niresponde sab dayon ang mga traffic enforcer ug police sa Mabolo Police Station aron sa pag-imbestigar sa insidente.
Nangayo og pasensya si Rumbines sa mga estudyante nga naangol.
Andam sila nga mubayad sa gasto sa bayranan sa hospital sa mga naangol.
Sigon ni Dinglas nga way nagrabehan sa mga naangol.
Nakabaton lang kini og mga bukol ug bun-og ug adunay usa ka estudyante nga napiit ang kamot apan di grabe.
Dugang ni Dinglas nga giimbitar nila ang drayber sa ilang presinto aron makuhaan og pahayag apan wa pa tugoti sa hospital ug gipaubos pa og obserbasyon.