Nangawat og hawok, priso

LALAKE napriso human nangawat og hawok, namaak pa og ngabil sa 7-anyos nga silingan sa Barangay Poblacion, Siyudad sa Talisay.

Matod sa 27 anyos nga lalake, gikyutan siya og maayo sa silingan nga bata hinungdan nga iyang gipaak ang mga ngabil nga niresulta sa paghubag sa ngabil bata, Huwebes sa gabii, Disyembre 19, 2019.

Sa dihang nakita sa inahan nga nihubag ang mga ngabil sa iyang anak, diha pa nasuta nga makadaghan na diay kini buhata sa suspek.

Daling nagpatabang ang inahan sa biktima ngadto sa barangay.

Si Fe Gonzales, Gender and Development (GAD) focal person sa Barangay Poblacion, nitug-an nga ang inahan sa batang babaye maoy nidangop sa ilang buhatan.

Nagdumili na sa paghatag ang GAD sa ngalan sa suspek kay silingan lang kini sa biktima.

Dugang ni Gonzales nga makadaghan na diay buhata sa suspek ang pagpanghawok dala ang paak sa ngabil sa bata, base na usab sa saysay sa biktima.

Saysay sa inahan sa biktima ngadto sa GAD nga nag-andam siya sa ilang panihapon niadtong Huwebes sa gabii sa dihang nananghid ang bata nga magkuha og tubig.

Apan giingon nga gikahinagbo ang suspek, kinsa daling nibira sa bata, dayon halok niini ug paak sa ngabil sa biktima.

Ang bata nga nakurat igo na lang sa paghilak ug nipauli sa ilang balay.

Diha pa nakita sa inahan nga nanghubag na ang ngabil sa bata ug naghilak hinungdan nga dali silang niduol sa barangay hall ug nisumbong.

Nilahos na usab sila sa Talisay City Police Station aron sa pagsumbong sa mga pulis hinungdan nga dali ra usab nasikop ang suspek.

Matod ni Gonzales nga saysay sa suspek nga nakyutan siya pag-ayo sa biktima tungod sa ka-chubby ug gihulagway nga lami nga kumot-kumoton.

“Pero lahi daw ang paghikap o layog sa suspetsado sa maong bata. Matod sa inahan ug dili na sad mao nga manghalok siya” asoy ni Gonzales.

Ang inahan disedido nga mopasaka og mga tukmang kaso batok sa iyang silingan nga kawatan og halok, mamaakay pa og ngabil.

Kasong child abuse ug sexual harassment hayan ipasaka batok sa suspek nga natanggong na sa Talisay City Police Station human masikop niadtong Huwebes sa gabii.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph