HAPIT tanang tawo dili na gusto
Molitok og ‘Maayong Pasko!’
Ngadto sa ilang isigka tawo
Kay mahadlok sila o maulaw
Nga masaypan nga mangayo
Og pinaskuhan o kayha regalo
Ning adlaw sa kalipay sa kalibutan
Sa Balaang Gasa sa Diyos Amahan.
Dautan ba diay ang pagpangayog
Pinaskuhan o bisan unsang regalo?
Mao ba gyud kana ang kahulogan
Sa pagtimbaya og ‘Maayong Pasko!’?
Dili ba pagpakita man kana
Og gugma sa imong isigka tawo?
O kaha usa ka paghatag og respeto
O pagpangayo og katahuran kanila?
Sama da kana sa ‘Maayong buntag!’
‘Maayong udto!’ ‘Maayong hapon!’
‘Maayong adlaw!’ o ‘Maayong gabii!’
Timbaya sa kalinaw sa adlaw sa Pasko.
Sa akong pagtimbaya kanimo
Og ‘Maayong Pasko!’ ako nangandoy
Sa kapiskay sa lawas ug grasya nimo
Ning Pasko ug sa sunod tuig nga bag-o.
Busa dili gayud nato angay wad-on
Ang pagtimbaya sa usag-usa ning panahuna.
‘Maayong Pasko, ninyong tanan, mga higala!
Ang Batang Diyos sa pasungan natawo na!’