ANG pag-abot sa Pasko maoy larawan
sa kalipay nga gisaad sa nagpaabot nga dughan,
maoy talikala nga nagdugtong sa way kinutobang
pagbati nga napulog gikan sa gugma nga lunsay
sa pagpinasayloay nga dalisay.
Ang sonata sa Pasko dili ordinaryo kay kini
gihulog gikan sa Langit aron ang mga kasingkasing
nga kabos hingpit nga mamunit sa tinuyong awit
nga gisaliyab gikan sa usa ka tulunggon nga gama
sa mga kamot sa manulunda ug iyang awitan
ang dughang nagmagul-anon, aron sa tibuok kalibutan
ang iyang Diwa molamdag sa agianan sa mga hinikawan ug tinalikdan.
Ang pagtumaw sa Pasko dili hilom kundili nagbasal
kini sa tambol ug nagpabuhot sa trumpeta sa kamaya
kay ang gipaabot mao man ang Gugma, nga dili makita
kundili hipalgan lamang diha sa nagliundok nga mga
Pinaskuhan ilawom sa punoan sa Christmas Tree.
Si Santa Klaus namaypay kay gialimut-an ilawom
ning dakong Christmas Tree. Gibubo niya ang tanan
niyang mga gasa ug pinaskuhan gikan sa dala niyang
puti nga sako. Gihimo niyang unlan ang mga pinaskuhan.
Ug kalit siyang nahipugwat sa nag-alirong nga mga bata
sa aseras, sa ekuwater ug sa mga libud-suroy
nga nanggisi ug nangabli sa mga pinutos nga Pinaskuhan
kay gipangita nila ang usa ka inahanon ug amahanon
nga gugma. Ug labaw sa tanan, ang Langitnon nga Gugma.