Nadela: Siguridad ning panahon sa Pasko

TUNGOD sa rekomendasyon sa mga doktor nga operahan ang bugon sa li-og sa akong asawa, hayan nga sa ospital mi mamasko.

Sa pagsud pa lang namo sa tambalanan sa uptown area sa dakbayan sa Sugbo, nasaksihan nako ang pagsud gawas sa daghang pasyente.

Daghan sab ko og mga kaila nga pasyente nga nagpaabot sa ilang turno nga maka kuha og lawak. Akong nasayran nga nagnihit sab ang kuwarto tungod sa kadaghan sa pasyente.

Laing kasayuran nga akong nahipos basta panahon sa bakasyon mas daghan ang magpa admit sa ospital tungod sa nagkadaiyang balatian. Sama sa akong misis gihuwat pa namo nga matapos ang klase sa among anak una mi niadto sa tambalanan sa niaging adlaw aron siya i-admit. Dili bag-o alang nako nga mamasko sa ospital.

Tungod sa iyang hubak naabtan sab mi og petsa 25 sa Disyembre pipila ka tuig na ang nakalabay. Dako kaayo og kalainan nga mag Nuche Buena ka sa inyong balay, itandi sa tambalanan.

Bisan unsa pa ka lami sa pagkaon nga andamon, way lami ihungit. Sa laktod way ganang ikaon nga magsud-ong ka sa imong pasyente nga nagluya.

Pero kutob sa mahimo imo nalang gyung pugson aron madasig sab ang imong pasyente pagpaambit sa mensahi sa diwa sa Pasko.

Gawas sa ka way ganang ikaon, samot nga wa gyuy kinabuhi ang kalangitan nga namuwak sa nagkadaiyang kolor sa pabuto nga manglupad pipila ka minutos sa di pa ang petsa 25.

Sa bintana sa ospital nimo ni masaksihan isip signal nga natawo na ang Manunubos. Taliwala ning tanan, mga pag-ampo alang sa daling kaayohan sa pasyente angayan nga maoy magpasuwabe aron sa sunod Pasko sa panimalay na magsaulog kauban ang tibuok pamilya.

Gawas sa mga pasyente, ang mga doktor, nurse ug ubang trabahante sa tambalanan nga nag duty panahon sa Pasko tuyong nibuwag sa ilang pamilya aron lang moserbisyo.

Sa mga pasyente ug ilang pamilya, di ta magpawa sa paglaum. Isipon nato nga usa ka hagit ang ingon niini nga sitwasyon ning atong pagpakabuhi sa kalibutan.

Gawas sa atong pagsalig sa katakus sa mga doktor, di nato kalimtan nga ang pag-ampo maoy yawe ning tanan tang kalisdanan.

•••

Gipahugtan og maayo ang siguridad sa mga dapit nga dagsaon sa mga bisita ning panahon sa Pasko. Sama sa naandan ang presensiya sa mga badlongon ilabi na ang mga dayo adto man gyud manukad sa mga barangay. Ang pasabot nga sa di pa sila magbahas bahas pagpangita og biktimahon, sa barangay man ni sila nag-abang og balay.

Ang uban sa ilang mga paryente nidangop. Duna say ni- check in sa mga pension house. Dinhi na masukod kinsa ang mga barangay ang dunay kasingkasing nga mopakgang sa ilang dautang tuyo. Kinsa sab ang mga barangay nga nagmika sa ilang responsabilidad pagtabang sa otoridad nga di sila maka pamiktima.