YANONG nakuha ni former World Boxing Association (WBA) interim Featherweight Champion Cebuano Jhack “El Capitan” Tepora ang 126.4 pounds samtang tukma sa catch weight si Colombian fighter Oscar Escandon sa 127 pounds atol sa weigh-in Sabado sa buntag, Disyembre 21, 2019 (Philippine time).
Ang Tepora batok Escandon usa ka 10-round non-title fight, usa sa undercard sa Tony Harrison versus Jermell Charlo alang sa World Boxing Council Super Middleweight championship nga gidalit sa TGB Promotions diin isalida sa Fox/FS1 Television nga duwaon sa Arena Toyota sa Ontario, California.
Importante kini nga away ni Tepora aron mahibalik pagsaka ang ratings niini sa rankings.
Si Tepora ubos karon ni Las Vegas, Nevada-based trainer Jorge Capetillo ug sa samang higayon cut man ni former world champion Tyson Fury.
Taud-taod na nga nagensayo si Tepora sa Las Vegas diin mga black Americans, Filipino boxer Recky Dulay ug Japanese former World Boxing Organization Bantamweight King Tomoki Kameda ang iyang mga ka-sparring.
Si Sean Gibbons ang Manny Pacquiao Promotions president mituyo pagkuha ni conditioning coach Memo Heredia aron pagmonitor sa timbang ni Tepora aron dili na masubli pa ang overweight nga kaso.
“Ang baruganan gyud ni Jhack nga bisan unsa'y record sa iyang kontra bisan kapila siya napildi dili gyud mi mo kumpyansa kanunay aron masiguro ang kalampusan,” batbat ning tigbalita ni Dinah Comision Tepora asawa ni Jhack.
Gitakda nga mobakasyon makadiyot sa Cebu ang magtiayong Tepora aron mobalik gilayon sa US alang sa preparasyon niini isip undercard sa nagsingabot nga fight ni Pinoy boxing icon Manny Pacquiao sa first quarter sa tuig 2020. (Daniel Quindao Guden, US Correspondent)