300 kapin ka balay ugdaw

SA ikaduhang higayon naigo na usab sa sunog ang Sityo Aroma, Barangay Subangdaku dakbayan sa Mandaue, diin kapin sa 300 ka mga balay ang nangaugdaw.

Ang maong dapit kansang luna gipanag-iya sa Aboitiz ug Tanchan makaduha na kahigayon nga nasunog.

Ang sunog nahitabo niadtong Marso 31, 2002 diin aduna usay kapin sa 300 ka mga balay ang naugdaw

Nagkanayon si SFO1 Julius Lloa sa Mandaue City Fire Department nga sa mga alas 2:15 kagahapon sa hapon nagsugod sa balay nga gipanag-iya ni Daisy Padronia ang kayo.

Sigun sa tabi-tabi sa mga silingan nga hayan nagsugod ang kayo sa dirty kitchen sa mga Padronia nga gituohan nga adunay giluto nga gibiyaan.

Sumala pa ni Lloa nga sud lang sa 20 minutos ilang nakontrolar ang kayo nga gi-isa ang alarm status sa Task Force Alpha.

Base sa talaan sa City Social Welfare and Services (CSWS) nga mokabat ngadto sa kapin 700 ka pamilya ang apektado sa sunog samtang kapin sa 300 ka balay ang na-ugdaw.

Gibana-bana nga mokabat sa P800,000 kapin kon kuwang ang danyos sa sunog.

Adunay duha ka mga tawo nga nangaangol human nangasamad atol sa ilang paghinakutay sa mga butang nga naglakip nila ni Fe Nabua, 18, kinsa samdan sa iyang tiil gumikan sa buak nga bildo ug Ramon Formentera, 32, ingon sa natabas ang kamot gumikan usab sa bildo.

Si Bise Mayor Carlo Fortuna nagkanayon nga karong adlawa atol sa regular session ilang ideklarar ang Sityo Aroma nga ubos sa state of calamity.

Matod pa ni Fortuna nga ilang hatagan og authority si Mayor Jonas Cortes nga makagamit sa calamity fund isip assistance sa mga nasunogan.

Niabag si Cortes sa mga nasunogan diin mga tent sa city government ang gitaod ingon man pagpa-andam sa mga gikinahanglanon sa mga biktima ilabi na sa ready to eat nga mga pagkaon.

Si Subangdaku Brgy. Capt. Walter Dy niingon nga ang mga lumolupyo di mamiya sa dapit kay basin di na sila makabalik o dunay laing moangkon sa ilang puwesto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph