KON plano pa nimo nga mouli aron moselebrar sa Pasko, aduna’y pahimangno ang Philippine Atmospheric, Geophysical and Astronomical Services Administration (Pagasa).
Mas maayo nga mouli bag-o mag-Lunes tungod kay gipanglantawan nga mobati na ang panahon sugod sa Lunes, Disyembre 23, 2019.
Kini tungod sa bagyo nga namat-an gawas sa Philippine Area of Responsibility (PAR) nga mao’y magdala og pag-uwan karong Paskoha.
“Better mobiyahe na this weekend, starting Monday sea condition is not favorable,” tambag ni Pagasa Visayas acting director Al Quiblat sa mga sumasakay sa barko.
Base sa weather update sa Pagasa Sabado, Disyembre 21 nasigpatan ang maong bagyo sa 1,855 kilometros Sidlakan sa Mindanao.
Kon hingpit na kini nga makasulod sa PAR sa Lunes, tawgon kining bagyo nga Ursula.
Adlawng Pasko, Disyembre 25, masigpatan ang maong bagyo sa 80 kilometros sa Amihanan Amihananang-Kasadpan sa Lapu-Lapu City sa Sugbo.
Gipanglantawan usab nga mo-landfall ang maong bagyo sa Eastern Visayas ug Caraga Administrative Region.
Gawas sa dagko nga bawod sa kadagatan sa Lunes, dako usab ang tsyansa sa uwan sa Martes ug Miyerkules. (HBL)